Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 657 Hüküm no: 516 Orijinal metin no: [121b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Efendi’nin vasisi olduğu Fatıma’ya olan borcunun terekeden ödenmesi Zikri âtî husûsun mahallinde istimâ‘ ve tahrîri içün bi’l-iltimâs savb-ı şer‘den me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Peykhâne kurbünde Emin Sinan mahallesinde sâkin umdetü’l-müderrisîn Mürşid Efendi b. el-müvellâ Süleyman Efendi’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre ahâlîsinden olup vilâyet-i Rumeli’nde medîne-i Yenişehir kādısı iken bundan akdem vefât eden merhûm-ı mezbûr Süleyman Efendi b. İbrahim b. Süleyman’ın verâseti kebîr oğlu mezbûr Mehmed Efendi ile zevce-i metrûkesi Ümmügülsüm Hatun bt. Abdullah’a münhasıra olup kable’l-kısmet mezbûr Ümmügülsüm Hatun dahi vefât edip verâseti mu‘takı Çerkes Ömer b. Abdullah nâm müteveffânın mu‘takı merhûm Muslu Ağa b. Bayram’ın kebîr oğlu Ahmed Ağa ile sagīr oğulları Abdullah Ağa ve Abdurrahman Ağa’ya münhasıra olduğu şer‘an zâhir ve mütehakkık oldukdan sonra mahmiye-i mezbûrede Küçük Ayasofya kurbünde Hüseyin Ağa mahallesinde sâkin iken bundan akdem vefât eden Yakub Efendi b. Mustafa’nın sagīre kızı Fâtıma’nın tesviye-i umûruna kıbel-i şer‘den vasî nasb olunan hâfızü’l-kitâb İsmail Çelebi b. İbrahim meclis-i ma‘kūd-ı mezbûrda müteveffâ-yı evvel-i mezbûra bi’l-verâse vaz‘-ı yed eden mezbûrân Mehmed Efendi ve Ahmed Ağa ile sagīrân-ı mezbûrânın tesviye-i emrlerine vasiyy-i şer‘îleri olan umdetü erbâbi’t-tahrîr ve’l-kalem Ali Efendi b. Bayezid b. Abdülgani tarafından husûs-ı âti’l-beyânı müseccel vekîli Hasan Efendi b. Osman mahzarlarında bi’l-vesâye üzerlerine da‘vâ takrîr-i kelâm edip müteveffâ-yı mezbûr Süleyman Efendi b. İbrahim b. Süleyman’ın, [122a] sagīr-i mezbûrenin vasiyy-i muhtârı olmağla mal-ı müntakilinden dokuz yüz elli guruşu medîne-i mezbûreye gider oldukda ahz u kabz ve mesârifine sarfla istihlâk edip hattâ meblağ-ı mezbûru vech-i muharrer üzere ahz u kabz ve mesârifime sarfla istihlâk etmekle zimmetimde sagīre-i mezbûreye edâsı lâzım deynimdir deyü kemâl-i sıhhatinde huzûr-ı Müslimînde ikrâr ve işhâd dahi edip sagīre-i mezbûreye sâhh olmadın meyyiten fevt olmağla hâlâ tereke-i vâfiyesinden taleb ederim suâl olunsun dedikde gıbbe’s-suâl ve’l-inkâr müdde‘î-i mûmâ-ileyhden sıdk-ı makāline beyyine taleb olundukda udûl-ı ahrâr-ı ricâl-i Müslimînden merhûm-ı mezbûrun etbâ‘ından Mustafa b. Hüseyin ve el-Hâc Mehmed b. Hızır nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka merhûm-ı mezbûr Süleyman Efendi b. İbrahim b. Süleyman medîne-i mezbûreye gider oldukda vasîsi olduğum sagīre-i mezbûre Fâtıma’nın mal-ı müntakilinden dokuz yüz elli guruşu ahz u kabz ve mesârifime sarfla istihlâk etmekle zimmetimde sagīre-i mezbûreye edâsı lâzım deynimdir deyü hâl-i kemâl-i sıhhatinde huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemîni’s-sagīreti’l-merkūme mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ve ma‘an ba‘s olunan Çukadâr el-Hâc Süleyman ve Muhzır Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 23 min-şehr-i Rebî‘ülâhir sene 1110. Şuhûdü’l-hâl: Osman Efendi b. Mustafa, Abdurrahman Efendi b. Halil, Osman Efendi b. Yusuf, İbrahim Efendi b. İlyas