Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 658 Hüküm no: 517 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Nasuh’un vefat etmeden Gülistan bt. Abdullah’ı azat ettiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen Mevlânâ Uşşâkī Mehmed Efendi irsâl olunup ol dahi mahmiye-i İstanbul’da At Meydanı kurbünde Firuz Ağa mahallesinde sâkin iken bundan akdem vefât eden el-Hâc Mehmed b. Nasuh’un menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûra rıkkiyet-i sâbıkını mu‘terife olan işbu uzun boylu, âhu sarı elâ gözlü, Rusiyyetü’l-asl, Müslimetü’l-millet bâ‘isetü’l-vesîka Gülistan bt. Abdullah meclis-i ma‘kūd-ı mezbûrda müteveffâ-yı mezbûrun vasiyy-i muhtârı olmağla rıkka olup terekeden olmak üzere kendine vaz‘-ı yed eden Süleyman Çelebi b. Hüseyin mahzarında üzerine da‘vâ ve takrîr-i kelâm edip seyyidim müteveffâ-yı mezbûr el-Hâc Ahmed b. Nasuh b. Mehmed hâl-i kemâl-i sıhhatinde yedinde câriye-i memlûke olduğum halde huzûr-ı Müslimînde malından beni âzâd ve i‘tâk ve sâir ahrâr-ı asliyâta ilhâk edip sâir ahrâr-ı asliyât gibi hürre olmuş iken vasiyy-i mezbûr bi-gayr-ı hakkın vaz‘-ı yed eder suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl vasiyy-i mezbûr cevâbında mevsûfe-i mezbûreye vech-i muharrer üzere vaz‘-ı yedini ikrâr ve müdde‘iye-i mezbûrenin müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı Müslimînden mahalle-i mezbûre sükkânından Abdurrahman Efendi b. el-Hâc Musa ve el-Hâc Hüseyin Efendi b. el-Hâc Yusuf li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr el-Hâc Ahmed b. Nasuh b. Mehmed hâl-i kemâl-i sıhhatinde işbu müdde‘iye-i mezbûreyi yedinde câriye-i memlûkesi iken malından huzûrumuzda âzâd ve i‘tâk edip mevsûfe-i mezbûre sâir harâir-i asliyât gibi hürre olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Nasuh Beşe ile meclis-i şer‘a gelip inhâ ve takrîr etmeğin mâ-vaka‘a kayd şüd. Fî 13 min-Cumâdelûlâ sene 1110. Şuhûdü’l-hâl: İbrahim Efendi imâm, Halil çorbacı, Ahmed Çelebi b. Mustafa, Mehmed b. Mustafa, ömer Bey b. Musa