Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 660 Hüküm no: 520 Orijinal metin no: [122b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin çocuklarına kalan arsanın satılmasına izin verildiği Mahmiye-i İstanbul’da Hoca Hayreddin mahallesinde sâkin iken bundan akdem vefât eden Ali Beşe b. Ahmed’in sagīr oğlu Süleyman ve sagīre Emine’nin vâlidesi ve kıbel-i şer‘den mansûbe vasiyeleri olup zâtı ta‘rîf-i şer‘î ile mu‘arrefe olan râfi‘atü’l-kitâb Safiye Hatun bt. Mehmed meclis-i şer‘de takrîr-i kelâm edip sagīrân-ı mezbûrâna babaları müteveffâ-yı mezbûrdan intikāl edip mahmiye-i mezbûrede Manisalı Çelebi mahallesinde vâki‘ lede’l-ahâlî ve’l-cîrân ma‘lûmetü’l-hudûd merhûm Mimâr Şücâ‘ Vakfı’na beher mâh on altı akçe icâre-i mu‘accelesi olan bir mikdâr arsa-i münharifenin hâsılı harcına vefâ etmeyip ve müeccelesini vermeye sagīrân-ı mezbûrânın iktidârları olmamağla bedel-i misli ile âhara bâ-ma‘rifet-i mütevellî ferâğ ve tefvîz ve bedel-i merkūm i‘mâl ve istirbâh olunmak sagīrân-ı mezbûrân hakkında evlâ olup hâkim-i muvakkı‘-ı sadr-ı kitâb efendi hazretleri vech-i muharrer üzere arsa-i münharife-i mezbûreyi âhara bey‘a izin vermeğin mâ-vaka‘a kayd şüd. Fî 14 min-Cumâdelûlâ sene 1110. Şuhûdü’l-hâl: es-Seyyid Hüseyin Çelebi b. Mehmed, Mehmed b. Hasan, Ali b. İsmail, Mustafa b. Abdurrahman