Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 659 Hüküm no: 519 Orijinal metin no: [122a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş’un vefatından önce hanımı Ayşe Hatun’u çocuklarının ve mecnun olan Ali’nin üzerine vasi tayin ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ İmâmzâde Mehmed Efendi b. Ahmed Efendi mahmiye-i İstanbul’da Cafer Subaşı mahallesi ahâlîsinden iken bundan akdem vefât eden Mehmed Çavuş b. Abdurrahman b. Abdülmennan’ın ile’l-vefât sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i hatîr eyledikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Mehmed Çavuş ile sulbiye kebîre kızları Fâtıma ve Afife’ye ve sagīre kızı Hadîce’ye ve sagīre oğlu İbrahim ile kebîr oğlu İsmail’e münhasıra olduğu şer‘an zâhir ve mütehakkık oldukdan sonra zâtı mahmiye-i mezbûrede Tahta Minâre mahallesinde sâkin Mehmed Beşe b. Ahmed ve Mahmud b. Halil ma‘rifetleriyle mu‘arrefe olan [122b] işbu râfi‘atü’l-kitâb mezbûre Âişe Hatun meclis-i ma‘kūd-ı mezbûrda zâtları mu‘arrifân-ı mezbûrân ta‘rîfleriyle mu‘arrefe olup müteveffâ-yı mezbûrun terekesine vâzı‘atü’l-yed olan mezbûretân Fâtıma ve Afife mahzarlarında üzerlerine da‘vâ ve takrîr-i kelâm edip zevcim müteveffâ-yı mezbûr Galatalı Mehmed b. Abdurrahman b. Abdülmennan fevtinden iki [ay] mukaddem hasta ve sâhib-i firâş olduğu halde sagīr oğlu İbrahim ve sagīre kızı Hadîce’nin rüşd-i sedâdlarına değin ve mahalle-i mezbûre ahâlîsinden olup cünûn-ı mutbık ile mecnûn olmağla vasiyy-i muhtârı olduğu Ali b. Abdullah’ın rüşdü zâhir olunca tesviye-i umûrlarına mahzar-ı Müslimîn’de beni vasiyy-i muhtâr nasb ve ihtiyâr edip ben dahi muvâcehesinde kabûl eylediğimden sonra müteveffâ-yı mezbûr musırran alâ-îsâihî fevt olmağın suâl olunup ihkāk-ı hak olunmak matlûbumdur dedikde gıbbe’s-suâl mezbûretân Fâtıma ve Afife cavâblarında babaları müteveffâ-yı mezbûrun terekesine vâzı‘atü’l-yed olduklarını ikrâr lâkin müdde‘iye-i mezbûrenin müdde‘âsını inkâr eylediklerinde müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre ahâlîsinden İmâm Veliyüddin Efendi b. Ahmed ve Hüseyin Çelebi b. Hasan nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Galatalı Mehmed Çavuş b. Abdurrahman b. Abdülmennan fevtinden iki ay mukaddem hasta ve alîl oldukda sulbî sagīr oğlu İbrahim ve sagīre kızı Hadîce’nin rüşd-i sedâdlarına değin ve mahalle-i mezbûreden olup cünûn-ı mutbık ile mecnûn olmağla vasiyy-i muhtârı olduğu Ali b. Abdullah’ın rüşdü zâhir olunca tesviye-i umûrlarına işbu müdde‘iye-i mezbûre Âişe Hatun’u bizim huzûrumuzda vasiyy-i muhtâr nasb ve ihtiyâr edip müdde‘iye-i mezbûre dahi vesâyet-i merkūmeyi muvâcehesinde kabûl eyledikden sonra müteveffâ-yı mezbûr musırran alâ-îsâihî vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Çukadâr el-Hâc Süleyman b. Abdullah ve Hasan Çelebi b. Abdullah ile meclis-i şer‘de inhâ ve takrîr etmeğin mâ-vaka‘a kayd şüd. Fî 11 min-şehri Rebî‘ülâhir sene 1110. Şuhûdü’l-hâl: Derviş Beşe b. Abdurrahman, el-Hâc Süleyman b. Ramazan, Mehmed Beşe b. Ahmed, el-Hâc Süleyman b. Abdullah, Muhzır Hasan Çelebi