Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 664 Hüküm no: 525 Orijinal metin no: [123a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belgradlı Hüseyin Ağa’nın bıraktığı paraların vasiyetine uygun olarak vasi Hüseyin Ağa tarafından dağıtıldığı Mahmiye-i İstanbul’da Esirci Kemâl mahallesinde sâkin iken vefât eden Belgradlı el-Hâc Hüseyin Ağa’nın vesâyâsını tenfîze bâ-hüccet vasiyy-i muhtârı olan Hüseyin Ağa b. Receb’in üzerine nâzır-ı muhtârı Ali Çelebi b. Abdullah ile nâzıra-i muhtâresi Bâdısabâ Hatun bt. Abdullah ba‘de’t-ta‘rîfi’ş-şer‘î meclis-i şer‘de hâfızü’l-kitâb vasiyy-i mezbûr Hüseyin Ağa mahzarında ikrâr ve takrîr-i kelâm edip müteveffâ-yı mezbûr el-Hâc Hüseyin Ağa’nın sülüs-i malından ber-mûceb-i defter-i kassâm-ı askerî para üç hesâbı üzere vasiyy-i mezbûr Hüseyin Ağa’nın makbûzu olan yüz seksen bin yedi yüz elli yedi akçenin altmış bin akçesini merhûm-ı mezbûrun vasiyeti üzere bedel-i hacc-ı şerîf içün verip ve altmış bin akçesini dahi bi’l-izni’ş-şer‘î eczâ-i şerîf içün vakfedip ve yirmi dört bin akçesini Bâdısabâ’ya verip ve yedi bin iki yüz akçesini Havva nâm hatuna esîr olmağla tahlîsi içün verip ve üç bin akçesini Mushaf-ı şerîf iştirâ ve vakfedip ve yedi bin iki yüz akçesini altmış nefer fakīre tasadduk edip ve bâkī on dokuz bin üç yüz elli yedi akçesini ıskāt-ı salât ve tabh-ı ta‘âm ve ta‘mîr-i kabir ve sâir vücûh-ı bir ve hayra bizim re’y ve ma‘rifetimizle harc ü sarf edip makbûzu olan meblağ-ı mezbûr yüz seksen bin yedi yüz elli yedi akçeden vasiyy-i mezbûr Hüseyin Ağa yedinde bir akçe ve bir habbe kalmayıp husûs-ı mezbûra ve bi’l-cümle beynimizde vâki‘ husûsa müte‘allık mezbûr Hüseyin Ağa ile vechen mine’l-vücûh da‘vâ ve husûmetimiz olmayıp masrûfu makbûlümüz olmuşdur dediklerinde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-âşir min-Cumâdelûlâ li-sene aşer ve mi’e ve elf. Şuhûdü’l-hâl: Ali Efendi b. Ahmed, Mustafa Beşe b. Mahmud, Hasan Çelebi b. Abdullah, Halil Çelebi b. Mehmed, Osman Çelebi b. Mehmed