Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 663 Hüküm no: 524 Orijinal metin no: [123a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hatun’un varislerinden Valide Hatun’un diğer kardeşleri üzerine açtığı davaya sulh bedeli karşılığı son verildiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den Mehmed Rûşenî Efendi irsâl olunup ol dahi mahmiye-i İstanbul’da Ali Paşa-i atîk mahallesinde sâkin Sırmakeş Mehmed Çelebi b. Sefer’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Emin Sinan mahallesinde sâkine iken bundan akdem vefât eden İsmihan Hatun bt. el-Hâc Yusuf’un sadrî kebîr oğlu Mehmed Ağa b. Yusuf Efendi ile kebîre kızları Vâlide ve Âişe ibnetey el-mezbûr Yusuf Efendi’ye münhasıra oldukdan sonra zâtı zevci Osman Bey b. Ahmed ve Mehmed Çelebi b. Sefer ta‘rîfleriyle mu‘arrefe olan mezbûre Vâlide Hatun meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olmağla terekesine vaz‘-ı yed eden hâfızatü’l-kitâb mezbûre Âişe Hatun muvâcehesinde ikrâr ve takrîr-i kelâm edip vâlidem müteveffâ-yı mezbûre İsmihan Hatun vefât edip terekesi beynimizde inkısâm olundukdan sonra benim hisseme isâbet eden on guruşu ahz u kabz eylediğimde kız karındaşım mezbûre Âişe ve vâlide-i müteveffât-ı mezbûrenin velâsından getirdiği nakid otuzar guruş ile mecmû‘u üç yüz guruş kıymetli bir çift altın bilezik ve iki çift sagīr altın küpe ve bir sîm zincir ve üç kilim ve bir sîm heykel ve bir kebîr kapaklı tas ve bir tepsi ve iki lengerî sahan ve bir kebîr tencere ve bir kefgir ve kefçe ve bir incili kuşak cümlesini mezbûre Âişe ketm ve ihfâ ve mîrâsa idhâlden imtinâ‘ eder deyü ben mezbûre Âişe’den hissemi taleb ve da‘vâ ve mezbûre bi’l-külliye inkâr edip husûs-ı mezbûreye benim beyyinem olmamağla mezbûre Âişe Hatun ketm ü ihfâ etmediğine iki def‘a yemîn verdikden sonra beynimizde muslihûn tavassut edip er karındaşım mezbûr Mehmed Ağa kendi malından bana on guruş dahi def‘ ü teslîm ben dahi meblağ-ı mezbûru yedinden kabz ü tesellüm edip husûs-ı mezbûra müte‘allık âmme-i da‘vâdan mezbûr Mehmed Ağa’nın ve mezbûre Âişe Hatun’un zimmetlerini ibrâ ve ıskāt eyledim, vâlide-i müteveffât-ı mezbûrenin terekesinden yedlerinde ve zimmetlerinde bir akçe ve bir habbe hakkım kalmadı dedikde gıbbe’t-tasdîk vâki‘ hâli mevlânâ-yı mezbûr Mehmed Rûşenî Efendi mahallinde ketb ü tahrîr ba‘dehû ma‘an mürsel Hüseyin b. Ahmed meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 16 min-Cumâdelûlâ sene 1110. Şuhûdü’l-hâl: İbrahim Çelebi b. Abdi, İbrahim Çelebi b. Sefer, Mehmed Çelebi b. Mehmed, Süleyman Çelebi b. Osman, Mustafa Çelebi b. Mehmed el-müezzin