Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 665 Hüküm no: 527 Orijinal metin no: [123b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hatun’un varislerinden Valide Hatun ile Mehmed Ağa arasındaki miras davasında sulh olunduğu Husûs-ı âti’l-beyânın mahallinde ketb ü tahrîri iltimâs olunmağın savbı şer‘den Mehmed Rûşenî Efendi irsâl olunup ol dahi mahmiye-i İstanbul’da Mimâr Kemâl mahallesinde sâkin Niğdeli Ali Ağa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf olundukda mahmiye-i mezbûrede Emin Bey mahallesinde sâkine iken bundan [akdem] vefât eden İsmihan bt. el-Hâc Yusuf’un verâseti sadrî kebîr oğlu Kādızâde Mehmed Ağa b. Yusuf Efendi ile sadriye kebîre kızları Vâlide ve Âişe hatunlara münhasıra oldukdan sonra zâtı zevci Osman Bey b. Ahmed ve Hasan Bey b. Ramazan ta‘rîfleriyle mu‘arrefe olan mezbûre Vâlide Hatun meclis-i ma‘kūd-ı mezbûrda karındaşı bâ‘isü’l-kitâb mezbûr Mehmed Ağa mahzarında ikrâr ve takrîr-i kelâm edip vâlidem mezbûre İsmihan Hatun vefât ettikde terekesinden ba‘de’l-ihrâcât benim hisseme isâbet eden on guruşu ben ahz u kabz edip vâlidem müteveffât-ı mezbûrenin mezbûr Mehmed Ağa zimmetinde deyn-i şer‘îden yüz guruş ve iki kürk semenlerinden yetmiş guruş cem‘an yüz yetmiş guruş hakkı vardır, meblağ-ı mezbûrdan dahi hissemi taleb ederim deyü ben mezbûr Ahmed Ağa’dan da‘vâ ve mezbûr Mehmed Ağa bi’l-külliye inkâr edip beynimizde münâza‘ât vukū‘undan sonra muslihûn tavassut edip on guruş üzerine inşâ-i akd-i sulh eylediklerinde ben dahi ba‘de’l-kabûl bedel-i sulh olan meblağ-ı mezbûr on guruşu mezbûr Mehmed Ağa kendi malından işbu meclisde tamâmen bana def‘ ü teslîm ben dahi ahz u kabz eyledim. El-hâletü hâzihi iddi‘â eylediğim meblağ-ı mezbûr yüz yetmiş guruş da‘vâsından ve âmme-i mîrâs da‘vâsından târîh-i kitâba gelince beynimizde âmme-i de‘âvîden mezbûr Mehmed Ağa’nın zimmetini ibrâ ve ıskāt eyledim ol dahi meblağ-ı mezbûr on guruş da‘vâsından benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î vâki‘ hâli mezbûr Mehmed Rûşenî Efendi mahallinde tahrîr ba‘dehû mürâsil Hüseyin Efendi b. Ahmed meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 16 min-Cumâdelûlâ sene 1110. Şuhûdü’l-hâl: İbrahim Beşe b. Piri, İbrahim b. Sefer, Mehmed Çelebi b. Mehmed, Süleyman Çelebi b. Osman, Mustafa b. Mehmed