Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 666 Hüküm no: 528 Orijinal metin no: [123b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Günlü ve aylı saati Hüseyin Ağa hayatta iken vasi Hüseyin Ağa’ya hibe ettiği Mahmiye-i İstanbul’da Esirci Kemâl mahallesinde sâkin iken bundan akdem vefât eden el-Hâc Hüseyin Ağa b. Oruc’un sulbiye sagīre kızı Ümmühani’nin vasiyy-i muhtârı Hüseyin Ağa b. Receb’in üzerine nâzır-ı muhtârı Ali Çelebi b. Ali’nin mahfil-i kazâda bâ‘isü’l-kitâb mezbûr Hüseyin Ağa mahzarında üzerine da‘vâ ve takrîr-i kelâm edip tereke-i müteveffâ-yı mezbûreden işbu bir sîm aylı ve günlü sâ‘ati mezbûr Hüseyin Ağa bi-gayr-ı vechin kabz ve defter-i kassâma idhâlden imtinâ‘ eder suâl olunsun dedikde gıbbe’s-suâl mezbûr Hüseyin Ağa cevâbında fi’l-hakīka işbu sâ‘at müteveffâ-yı mezbûrun mülkü olup hâl-i hayâtında bana hîbe-i sahîha-i şer‘iyye ile hîbe ve temlîk ve teslîm ben dahi temellük ve kabz ve kabûl etmekle mülk-i mevhûbumdur dedikde gıbbe’l-istintâk ve’l-inkâr mezbûr Hüseyin Ağa’dan def‘-i mezkûruna beyyine taleb olundukda udûlden mahmiye-i mezbûrede Sekbanbaşı Yakub Ağa mahallesinde sâkin Ahmed Çelebi b. Abdullah ve Halil b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu sîm aylı ve günlü sâ‘at müteveffâ-yı mezbûrun el-Hâc Hüseyin Ağa b. Oruc’un mülkü olup hâl-i hayâtında bizim huzûrumuzda işbu vasiyy-i mezbûr Hüseyin Ağa’ya hîbe-i sahîha-i şer‘iyye ile hîbe ve temlîk ve teslîm ol dahi ittihâb ve temellük ve tesellüm ve kabz ve kabûl eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd şüd. Fî 10 min-Cumâdelûlâ sene 1110. Şuhûdü’l-hâl: Ali Ağa b. Ahmed, Ali Efendi b. Ahmed, Mustafa b. Mahmud, Osman b. Mehmed, Bekir Bey berber