Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 674 Hüküm no: 538 Orijinal metin no: [125b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin v. Kosta’nın ölmüş olan Karabet’ten alacağı olduğu Mahmiye-i İstanbul’da Şeyh Ferhad mahallesinde sâkin bâ‘isü’s-sifr Şahin v. Kosta nâm zimmî meclis-i şer‘de berât-ı âlîşân ile askerî olup mahmiye-i mezbûrede zikr olunan Şeyh Ferhad mahallesi ahâlîsinden olup düyûnu terekesinden ezyed olduğu halde hâlik olan Karabet v. Sakar v. Hüdaverdi’nin veresesi terekesinden kasr-ı yed etmekle tesviye-i umûruna ve guremâsıyla husûmet ve redd-i cevâba vasî ve kayyım nasb olunmağla terekesine vaz‘-ı yed eden Yani v. Agbal nâm zimmî mahzarında üzerine da‘vâ ve takrîr-i kelâm edip hâlik-i mezbûr Karabet v. Sakar v. Hüdaverdi zimmetinde cihet-i karz-ı şer‘îden dört yüz altmış guruşu ve hayâtında hâlik-i mezbûrun emriyle Beypazarı kazâsında Sarılar nâm mahalde vâki‘ köprü ta‘mîrine sarf eylediğim yüz guruş ki min-haysü’l-mecmû‘ altı yüz on guruş hakkım olup hattâ hâlik-i mezbûr Karabet v. Sakar hâl-i kemâl-i sıhhatinde ciheteyn-i mezbûreteynden zimmetinde bana ol kadar guruş deyni olduğunu alâ-ruûsi’l-işhâd ikrâr ve işhâd edip meblağ-ı mezbûru kable’l-edâ hâlik olmağla yed-i vaz‘da olan tereke-i kāsırasından taleb ederim suâl olunsun dedikde gıbbe’s-suâl vasiyy-i mezbûr cevâbında tereke-i hâlik-i mezbûra vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda mahmiye-i mezbûrede Vâlide Hanı’nda sâkin Marat v. Anastaş ve Arotin v. Serkiz li-ecli’ş-şehâde meclis-i şer‘a hâzırân olup isre’l-istişhâd fi’l-hakīka hâlik-i mezbûr Karabet v. Sakar v. Hüdaverdi hâl-i kemâl-i sıhhatinde işbu müdde‘î-i mezbûr Şahin’e cihet-i karzdan dört yüz altmış guruş ve zikr olunan Beypazarı kazâsında Sarılar nâm mahalde hâlik-i mezbûrun emriyle ta‘mîr ettiği köprü mesârifine sarf eylediği yüz elli guruş ki min-haysü’l-mecmû‘ altı yüz elli guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra meblağ-ı mezbûr altı yüz on guruşu hayâtında yedinden veyâ vekîli yedinden almayıp veyâ mukābelesinde rehin veyâ âhara havâle etmeyip ve bi’l-cümle turuk-ı şer‘iyye bir tarîk ile zimmetini ibrâ etmediğine merkūm Şahin’e yemîn teklîf olundukda ol dahi ber-vefki’l-mesûl yemîn billâhillezî enzele’l-İncîle alâ Îsâ -aleyhi’s-selâm- etmeğin mûcebiyle ba‘de’l-hükm mâ-vaka‘a bi’t-taleb ketb şüd. Fî 16 min-Cumâdelûlâ li-seneti’l-merkūme. Şuhûdü’l-hâl: İmâmzâde Mehmed Efendi b. Ahmed, Abdurrahman Efendi b. Ahmed, Yahya Efendi b. Mustafa, Nükâtî Ali Efendi b. Osman, İbrahim b. Mehmed el-muhzır, Süleyman Beşe b. Yusuf, Hasan Çelebi b. Mustafa, Ahmed Çelebi b. Mustafa, Yakub Çelebi b. (°) el-müezzin