Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 673 Hüküm no: 537 Orijinal metin no: [125a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Belgradlı Hüseyin’in kızı Ümmühani’nin vasisi Hüseyin Ağa’nın terekeden bir şey saklamadığı Mahmiye-i İstanbul’da Esirci Kemâl mahallesinde sâkin iken bundan akdem vefât eden Belgradlı el-Hâc Hüseyin b. Oruc’un sulbiye sagīre kızı Ümmühani’nin tesviye-i umûruna vasiyy-i muhtârı olan Hüseyin Ağa b. Receb’in üzerine nâzırları Ali Çelebi b. el-Hâc Ubeyd ve Bâdısabâ Hatun bt. Abdullah mahfil-i kazâda bâ‘isü’l-kitâb vasiyy-i mezbûr Hüseyin Ağa mahzarında üzerine da‘vâ ve takrîr-i kelâm edip mezbûr Hüseyin Ağa müteveffâ-yı mezbûr el-Hâc Hüseyin’in terekesinden her miskāli dörder guruş zammıyla altı miskāl anberi ve sekiz yüz guruşu ketm ü ihfâ etmişdir, suâl olunup defter-i kassâma idhâl olunmak murâdımdır dedikde gıbbe’s-suâl ve’l-inkâr zikr olunan müdde‘îlerden müdde‘âsına beyyine taleb olundukda ityân-ı beyyineden ızhâr-ı acz edip ve vasiyy-i mezbûr tahlîf murâd eylediklerinde zikr olunan altı miskāl anber ile meblağ-ı mezbûr sekiz yüz guruşu ketm ü ihfâ etmeyip ve üzerine bir vechile redd ü zamân lâzım gelmediğine vasiyy-i mezbûr Hüseyin Ağa’ya yemîn teklîf olundukda ol dahi hasebi’l-mesûl yemîn billâhi’l-aliyyi’l-a‘lâ etmeğin mûcebiyle müdde‘iyân-ı mezbûrân husûs-ı mezbûra müte‘allık bilâ-beyyine mu‘ârazadan men‘ birle mâ-vaka‘a ketb şüd. Fî 10 min-şehr-i mezbûr. Şuhûdü’l-hâl: Mustafa b. Mahmud, Hasan Ağa b. İbrahim, Halil b. Mehmed, Ahmed Bey b. Abdullah, Ali Efendi b. Ahmed