Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 677 Hüküm no: 541 Orijinal metin no: [126a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beşir b. Abdullah’ın hayatta iken Şahin b. Abdullah’ı azat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan İmâmzâde Mevlânâ Mehmed Efendi b. Ahmed Efendi irsâl olunup ol dahi mahmiye-i İstanbul’da Kiçi Hatun mahallesinde sâkin Hasan Ağa b. Abdurrahman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde Dergâh-ı âlî yeniçerilerinden ve mahmiye-i mezbûrede Tülbentci Hüsam mahallesinde sâkin iken bundan akdem vefât eden Harrât el-Hâc Beşir b. Abdullah b. Abdullah’ın zâhirde vâris-i ma‘rûfu olmamağla mecmû‘-ı muhallefâtı cânib-i beytülmâle âid oldukdan sonra müteveffâ-yı mezbûra rıkk-ı sâbıkını mu‘terif olan uzun boylu, açık kaşlı, sarı elâ gözlü, Macariyyü’l-asl râfi‘ü’l-kitâb Şahin b. Abdullah nâm şâbb-ı emred meclis-i ma‘kūd-ı mezbûrda mahmiye-i mezbûrede Yeniçeri Beytülmâli emîni olup husûs-ı âti’z-zikrde husûmet ve redd-i cevâba kıbel-i şer‘den me’zûn olmağla kendüye rık olup müteveffâ-yı mezbûrun terekesinden olmak zu‘muyla vaz‘-ı yed eden el-Hâc Hüseyin Ağa b. Muslu mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Beşir b. Abdullah b. Abdullah yedinde mülk ve hakkı olduğum halde fevtinden bir sene mukaddem beni huzûr-ı Müslimînde malından âzâd etmekle ben sâir ahrâr-ı asliyât gibi hür olmuş iken emîn-i mezbûr bana rık olmak üzere vaz‘-ı yed eder suâl olunup sebîlim tahliye olmak matlûbumdur dedikde gıbbe’s-suâl ve’l-inkâr müdde‘î-i mezbûrda müdde‘âsına beyyine taleb olundukda udûl-ı ahrâr-ı ricâl-i Müslimînden Süleyman Ağa mahallesinden Mustafa b. Ömer Efendi b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Beşir b. Abdullah b. Abdullah hâl-i kemâl-i sıhhatinde fevtinden bir sene mukaddem bizim huzûrumuzda malından âzâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Mehmed b. Halil ve Hasan b. Abdullah ile meclis-i şer‘a gelip inhâ ve takrîr etmeğin mâ-vaka‘a kayd şüd. Fî gurre-i Cumâdelevvel sene 1110. Şuhûdü’l-hâl: Mehmed Efendi b. Mustafa, Hasan Ağa b. Abdurrahman, Mehmed Ağa b. Abdullah, Baba Yusuf b. Abdullah, Mehmed Ağa b. Mustafa, İbrahim Beşe b. Abdullah