Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 678 Hüküm no: 542 Orijinal metin no: [126a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Agıl’ın ölmüş olan Karabet’te ticaret malından alacağı olduğu Mahmiye-i İstanbul’da Şeyh Ferhad mahallesinde sâkin bâ‘isü’s-sifr Yani v. Agıl nâm Ermeni meclis-i şer‘de berât-ı âlîşân ile askerî olup mahalle-i mezbûrede sâkin iken düyûnu terekesinden ezyed olduğu halde hâlik olan Karabet v. Sakar v. Hüdaverdi’nin tesviye-i umûruna tashîhan li’d-da‘vâ vasî ve kayyım nasb olunan Ugrali v. Simyon nâm Ermeni muvâcehesinde üzerine da‘vâ ve takrîr-i kelâm edip hâlik-i mezbûr Karabet v. Sakar v. Hüdaverdi ile bin yüz yedi senesi Recebi gurresinden beş yüz guruş benim re’s-i malım ve iki bin guruş hâlik-i mezbûrun re’s-i malı cem‘an iki bin beş yüz guruş halt ve ben i‘mâl edip hâsıl olan fâidesi benim olup ben dahi bu mukābelede hâlik-i mezbûrun Ankara’da şerîki Murad’ın İzmir’e gönderdiği emti‘a-i mütenevvi‘ayı İzmir’de tebdîl edip İstanbul’a mezbûr Karabet’e irsâl ve sâir hizmeti dahi görüp mecmû‘-ı fâide benim olmak üzere akd-i şirket ve minvâl-i muharrer üzere yedine temessük dahi verdim, târîh-i merkūmda beni İzmir’e irsâl eyledikde ben dahi meblağ-ı merkūm iki bin beş yüz guruş ile eşyâ alıp kendüye irsâl ve şerîkim Murad’ın gönderdiği emti‘a-i mütenevvi‘ayı çukaya tebdîl ve İstanbul’da mezbûr Karabet’e irsâl ve îsâl ve sâir hizmetini itmâm edip bu vech üzere üç sene hizmet eylediğimden sonra İstanbul’a gelip târîh-i fevtinden otuz gün mukaddem kendi ile hesâb görüp fesh-i akd-i şirket eylediğimizde kendi re’s-i malı olan iki bin guruşu kabz ettikden sonra benim re’s-i malım olan beş yüz guruş ile üç senede benim i‘mâlim ile hâsıl olan yedi yüz guruşu dahi ahz u kabz ve mesârifine sarfla istihlâk etmekle meblağayn-ı merkūmeyn mezkûr iki yüz elli guruş def‘aten bana edâsı lâzım deyni olduğunu beyne’ş-şuhûd ikrâr ve işhâd edip kable’l-edâ hâlik olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda mahalle-i mezbûre sükkânından Şahin v. Kosta ve zikr olunan handa sâkin tüccârdan Marat v. Anastaş v. Hüdaverdi hayâtında târîh-i mezbûrda iki bin guruş hâlik-i mezbûrun re’s-i malı ve beş yüz guruş işbu müdde‘î-i mezbûrun re’s-i malı olup birbirine halt ve işbu mezbûr Yani’nin olup ol dahi mukābelesinde İzmir’e varıp hâlik-i mezbûrun şerîki Murad’ın gönderdiği eşyâyı tebdîl ve İstanbul’a irsâl ve sâir hizmetini dahi görüp ol mukābelede mecmû‘-ı fâideyi mezbûr Yani almak üzere akd-i şirket edip ba‘dehû mezbûr Yani İzmir’e varıp meblağ-ı merkūm ile eşyâ alıp irsâl ve şerîki Murad’ın irsâl eylediği eşyâyı çukaya tebdîl edip İstanbul’a irsâl ve îsâl ve sâir hizmetini dahi itmâm ve üç sene bu vech üzere hizmet eyledikden sonra mezbûr Yani İstanbul’a gelip hâlik-i mezbûr ile huzûrumuzda hesâbların görüp fesh-i akd-i şirket eylediklerinde hâlik-i mezbûr Karabet re’s-i malı olan iki bin guruşu kabz edip ve işbu müdde‘î-i mezbûrun re’s-i malı olan beş yüz guruş ile mezbûr malının i‘mâliyle üç senede hâsıl olan yedi yüz elli guruş fâideyi kabz ve mesârifine sarfla istihlâk etmekle meblağayn-ı merkūmeyn bin iki yüz elli guruşu müdde‘î-i mezbûr Yani’ye zimmetimde deynimdir deyü ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd şüd. Fî 17 Cumâdelâhire sene 1110. Şuhûdü’l-hâl: es-Seyyid Ömer Efendi Eyüb kassâmı, el-Hâc Mehmed Efendi [b.] Ahmed, el-Hâc Hüseyin Efendi b. Mehmed, Ahmed b. Süleyman, İbrahim Çelebi b. Mehmed, Hüseyin Ağa b. Mehmed, Mehmed b. Ahmed