Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 691 Hüküm no: 551 Orijinal metin no: [128b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un oğlu Ahmed’in vasisi Ahmed Çelebi’nin yerine Yusuf Çelebi’nin tayin edilerek nafaka takdir edildiği Mahmiye-i İstanbul’da Dâye Hatun mahallesi sâkinelerinden olup bundan akdem Şam-ı şerîfde fevt olan Hadîce Hatun bt. Celasin’in sadrî sagīr oğlu Ahmed’in tesviye-i umûruna vasiyy-i mansûbu olan üvey babası Ahmed Çelebi b. Mustafa vesâyet-i mezbûreden kasr-ı yed etmekle azlolunup yerine bir vasî ta‘yîni lâzım olmağın emânet ile ma‘rûf olup vesâyet uhdesinden gelmeye kādir idiği lede’ş-şer‘ zâhir olan hâfızü’l-kitâb Yusuf Çelebi b. Abdullah’ı hâkim-i muvakkı‘-ı sadr-ı kitâb hazretleri sagīr-i mezbûrun tesviye-i umûruna vasî nasb buyurup ol dahi vesâyet-i mezbûreyi kabûl ettikden sonra vasiyy-i mezbûr talebiyle sagīr-i mezbûrun nafaka ve kisvesi’çün mal-ı müntakilinden târîh-i kitâbdan yevmî iki para farz ve takdîr buyurup meblağ-ı mezbûru levâzım-ı sagīre harca ve vakt-i hâcetde istidâneye vasiyy-i mezbûra izin birle mâ-vaka‘a bi’t-taleb ketb olundu. Fî gurre-i Cumâdelûlâ sene 1110. Şuhûdü’l-hâl: Yahya Efendi b. Mustafa, Ahmed Efendi b. Mehmed, Veli Beşe b. Ahmed, Yusuf Beşe b. Abdullah