Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 692 Hüküm no: 552 Orijinal metin no: [128b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un oğlu Ahmed’in vasisi Ahmed Çelebi’nin, önceki vasi Yusuf Çelebi’den çocuğun haklarını tamamen aldığı Mahmiye-i İstanbul’da Dâye Hatun mahallesi sâkinelerinden olup Şam-ı şerîfde fevt olan Hadîce Hatun bt. Celasin’in sadrî sagīr oğlu Ahmed’in tesviye-i umûruna kıbel-i şer‘den hâlâ vasiyy-i mansûbu Yusuf Çelebi b. Abdullah mahfil-i kazâda kitâbdan mukaddem sagīr-i mezbûrun vasiyy-i mansûbu olan üvey babası Ahmed Çelebi b. Mustafa mahzarında ikrâr edip mezbûr Ahmed Çelebi sagīr-i mezbûrun benden mukaddem vasiyy-i mansûbu olmağla müteveffât-ı mezbûrenin hîn-i fevtinde yanında mevcûd olan terekesinden ber-mûceb-i defter-i kassâm-ı Şam, sagīr-i mezbûrun hissesi olan dört bin dokuz yüz doksan beş sağ akçe ile İstanbul’da olan terekesinden kezâlik ber-mûceb-i defter-i kassâm hissesi olan iki bin beş yüz altmış iki akçesini kabz etmekle cem‘an makbûzu olan yedi bin beş yüz elli yedi akçeyi vesâyetim hasebiyle mezbûr Ahmed Çelebi’den da‘vâ edip ol dahi meblağ-ı mezbûrun altı bin dört yüz seksen akçesini iki senede bâ-hüccet yevmî üçer paradan nafakasına sarf ettim deyip mâ‘adâyı bana teslîm etmek üzere iken ben dahi hâric ez-defter terekeden otuz altın ile yirmi guruşluk eşyâsını ketm ü ihfâ eyledin deyü da‘vâ lâkin husûs-ı mezbûra beyyinem olmamağla zikr olunan otuz altın ile yirmi guruşluk eşyâyı ketm etmeyip ve nafakada kâzib olmadığına mezbûr Ahmed Çelebi’ye yemîn teklîf ettikde ol dahi yemîn etmek üzere iken muslihûn tavassut edip fedâ-i li’l-yemîn bana kendi malından yirmi altı guruş def‘ edip meblağ-ı mezbûru sagīre içün kabzım hakkında mukaddem mahzar olmağla meblağ-ı mezbûr yirmi altı guruş ile zimmetinde bâkī kalan bin yetmiş yedi sağ akçeyi mezbûr Ahmed Çelebi yedinden tamâmen alıp kabz eyledim ba‘de’l-yevm tereke-i müteveffât-ı mezbûreden mezbûr Mehmed Çelebi zimmetinde bâkī bir şey kalmadı dedikde gıbbe’t-tasdîk mâ-vaka‘a bi’t-taleb ketb olundu. Fî 15 Cumâdelûlâ sene 1110. Şuhûdü’s-sâbikūn