Bab Mahkemesi 54 Numaralı Sicil (H. 1102 / M. 1691) cilt: 20, sayfa: 57 Hüküm no: 9 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Bey b. İbrahim’in Ali b. Mahmud’a ödediği ancak teslim alamadığı tarla bedelleri konusunda mirasçılarıyla anlaştığı Vilâyet-i Anadolu’da Bolu sancağında Devrekani kazâsına tâbi‘ Bukince? nâm karye ahâlîsinden olup, mahmiye-i İstanbul’da müsâfir olan İsmail Bey b. İbrahim nâm kimesne meclis-i şer‘-i şerîfde, fi’l-asl karye-i mezbûreden olup mahmiye-i mezbûrede Bıçakçı Ali mahallesinde mutavattın iken vefât eden Ali b. Mahmud nâm kimesnenin verâseti, vâlidesi Ayşe bt. Cafer ile zevce-i metrûkesi Fâtıma bt. Abdi ve sulbî sagīr oğlu İsmail[‘e] münhasıra olmağla, terekesine asâleten ve vesâyeten vâzı‘atü’l-yed oldukları lede’ş-şer‘i’l-mutahhar zâhir ve mukarrer olan mezbûretân Ayşe Hâtun ve Fâtıma Hâtun mahzarlarında ikrâr-ı tâm ve takrîr-i kelâm edip, bin dokuz senesi ile müverraha işbu yedimde mazmûnu müsbit hüccet nâtıka olduğu üzre merkūm Ali hâl-i hayâtında karye-i mezbûrede mevâzi‘-i adîdede vâki‘ beyne ahâli’d-diyâr ma‘lûmü’l-hudûd ve’l-mikdâr ammi Süleyman ile ber vech-i iştirâk mutasarrıf oldukları tarlalarda olan hisse-i şâyi‘asını on iki guruş bedel-i makbûz mukābelesinde bana ferâğ ve tefvîz, ben dahi ber vech-i muharrer tefevvüz ve kabûl ve karye-i mezbûreye varıp zabt ve tasarruf eylediğimde, zikr olunan tarlalarda ber vech-i meşrûh müteveffâ-yı mezbûrun hissesi olan tarlaları sâhib-i arz âhara tefvîz etmekle, bana şer‘an zabt ve tasarruf müyesser olmamağın, medfû‘um olan bedel-i merkūm on iki guruşu bana kable’l-edâ mezbûr Ali vefât edip zimmetinde kalmağın, ben dahi bundan akdem meblağ-ı mezbûru mezbûretân Ayşe Hâtun ile Fâtıma Hâtun taleb ve da‘vâ ve müdde‘âmı muvâcehelerinde şuhûd-ı udûl ile isbât edip ve ben tahlîf-i şer‘î ile tahlîf olduğumdan sonra ve hükm-i hâkimü’ş-şer‘ dahi lâhık olmuşdu. El-hâletü hâzihî mezbûretân Ayşe Hâtun ve Fâtıma Hâtun’un tavassut-ı muslihûn ile meblağ-ı mezbûr on iki guruşdan bin akçe üzerine benimle sulh olduklarında, ben dahi ber vech-i muharrer sulh-ı mezbûru kabûl ve bedel-i sulh olan meblağ-ı mezbûr bin akçeyi tereke-i mezbûreden mezbûretân yedlerinden tamâmen ahz u kabz edip, mâ‘adâ beş yüz akçe da‘vâsından zimmetlerini ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Osman b. Hasan, İbrahim Çelebi b. Mehmed, Ali Çelebi b. Bâli.