Bab Mahkemesi 54 Numaralı Sicil (H. 1102 / M. 1691) cilt: 20, sayfa: 58 Hüküm no: 10 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hacı Mehmed’in evini Mehmed Efendi b. Abdullah ve Mümine bt. Ali’ye satması Mahmiye-i İstanbul’da Yenibahçe kurbunda Karabaş mahallesinde sâkin el-Hâc Mehmed Ağa b. el-Hâc Mehmed meclis-i şer‘-i şerîf-i enverde, bâ‘isiyyü’l-kitâb Mehmed Efendi b. Abdullah tarafından ikrâr-ı âtî tasdîka vekîl olduğu Berber Mustafa Çelebi b. Mehmed ve Ali Çelebi b. İbrahim şehâdetleriyle şer‘an sâbit olan diğer Mustafa Çelebi b. Abdullah mezbûr Mehmed Efendi’nin kayın anası Mümine bt. Ali nâm hâtunun sadrî oğlu ve kezâlik tarafından vekîl olduğu şâhidân-ı mezbûrân şehâdetleriyle sâbit olan âhar Mustafa Çelebi b. Sâlih nâm kimesneler mahzarlarında ta‘bîr ani’l-merâm ve takrîr-i kelâm [2b] edip, akd-i âtî sudûruna değin yedimde mülk ve hakkım olup, mahalle-i mezbûrede vâki‘ iki tarafdan el-Hâc İbrahim b. Ahmed mülkü ve bir tarafından ba‘zan Ahmed Çelebi b. Ramazan mülkü ve ba‘zan Hüseyin b. Abdullah mülkü ve taraf-ı râbi‘i tarîk-i âmla mahdûd, dâhiliyesi iki fevkānî oda ve sundurma ve tahtânî bir mutfak ve kiler ve kenîf ve su kuyusu ve cüneyne ve hâriciyesi tabaka-i ulyâsında bir oda ve bir sofa ve vustâsında iki oda ve süflâsında bir ahır ve musluk ve kenîf ve avluyu müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bey‘-i bâtt-ı sahîh-i şer‘î ile müvekkilân-ı mezbûrân Mehmed Efendi ve Mümine Hâtun’a altı yüz doksan beş esedî guruşla adedi nâ-ma‘lûm bir fızza fülûs-ı makbûza ve muzî‘aya bey‘ ve teslîm, onlar dahi iştirâ-i seviy üzre iştirâ ve kabûl ve tesellüm ettiklerinden sonra meblağ-ı mezbûr altı yüz doksan beş esedî guruşa dahi yedlerinden tamâmen ahz u kabz ve istîfâ eyledim. Ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmayıp, müvekkilân-ı mezbûrân Mehmed Efendi ve Mümine Hâtun’un iştirâken mülk-i müşterâları ve hakk-ı sırfları olmuşdur, keyfe mâ yeşâ ve yahtârân mutasarrıfân olsunlar dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Hasan Efendi b. Mustafa el-imâm, Abdullah Halîfe b. ( ) el-müezzin, Mustafa Çelebi b. Eyüb, Hasan Beşe b. Abdi, Ali Çelebi b. İbrahim, Halil Beşe b. İbrahim, Mustafa Çelebi b. Sâlih.