Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 697 Hüküm no: 558 Orijinal metin no: [130a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Ahmed Odabaşı’nın oğlu Ebubekir’in vasisi olan Mehmed Odabaşı’nın muhasebe defteri Mahmiye-i İstanbul’da Yenibahçe kurbünde Karabaş mahallesi sâkinlerinden iken bundan akdem vefât eden Yağcı el-Hâc Ahmed Odabaşı b. Mehmed’in sulbî sagīr oğlu Ebubekir’in vasiyy-i şer‘îsi el-Hâc Yusuf b. Abdullah’ın üzerine hasbî nâzır nasb olunan sagīr-i mezbûrun li-ebeveyn ammi Mehmed Odabaşı talebiyle vasiyy-i mezbûrun bin yüz dokuz Rebî‘ülevvelinin on beşinci gününden târîh-i deftere gelince makbûz ve masrûfunun görülen hesâbı defteridir ki ber-vech-i âtî zikr olunur. Hurrire fî gurreti Cumâdelûlâ li-sene aşer ve mi’e ve elf. Ber-mûceb-i defter-i kassâm-ı askerî sagīr-i mezbûra babası müteveffâ-yı mezbûrun terekesinden para üçer akçe hesâbı üzere gayri ez-menzil hissesine isâbet etmekle vasiyy-i mezbûrun makbûzu meblağ 57.089 akçe Ba‘dehû vefât eden karındaşı İbrahim nâm sagīrin kezâlik para üç akçe hesâbınca defter-i kassâm-ı askerî mûcebince isâbet etmekle vasiyy-i mezbûrun makbûzu meblağ 22.266 akçe Ba‘dehû vefât eden karındaşı Ahmed’den sagīr-i mezbûrun hissesine ber-mûceb-i defter-i mezkûr isâbet etmekle vasiyy-i mezbûrun makbûzu 49.966 akçe Sagīr-i mezbûrun İstanbul’da Bezzâzistân’da olan dolabı ve Çadırcılar sûkunda olan dükkân ve Edirnekapısı’nda olan bezirhâne ve Samatya’daki menzil ve Sukulesi nâm mevzi‘de olan menzil ve Hadîce Sultan mahallesinde ve Mesihpaşa mahallesinde odalar hisselerinden vakıf icâreleri edâ olundukdan sonra müddet-i mezkûrelere hâsıl olmağla vasiyy-i mezbûrun kezâlik para üçer akçe hesâbınca makbûzu be-hesâb-ı meblağ 5.420 akçe Yekûn: 134.835 akçe Minha’l-ihrâcât Bâlâda tahrîr olunan dolab ve menâzil ve dekâkîni ve odaların meremmâtı müddet-i mezbûrede kezâlik para üç hesâbınca vasiyy-i mezbûrun masrûfu 2.096 akçe Sagīr-i mezbûrun müddet-i mezbûrede nafaka-i mefrûzasına bâ-hüccet-i şer‘iyye vasiyy-i mezbûrun masrûfu 7.200 akçe Sagīr-i mezbûrun îdiye ve şitâiye vasiyy-i mezbûrun masrûfu 2.330 akçe Harc-ı defter-i muhâsebe ve kalemiye 540 akçe Yekûn: 12.166 akçe Sahhe’l-bâkī, para üçer akçe hesâbıncadır: 122.669 akçe Vasiyy-i mezbûrun bâlâda tahrîr olunduğu üzere nâzır-ı mezbûr ma‘rifetiyle hesâbı görüldükde ba‘de ihrâci’l-mesârif para üçer akçe hesâbınca gayri ez-menzil-i bargir yüz yirmi iki bin altı yüz altmış dokuz akçe kaldığı bu mahalle şerh verildi. Şuhûdü’l-hâl: Kâtib-i muhâsebe Abdurrahman Efendi b. Mehmed, el-Hâc Hüseyin Ağa b. Fazlı, İbrahim Beşe b. Ömer, Yusuf Efendi b. Nebi