Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 707 Hüküm no: 565 Orijinal metin no: [131b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gonca bt. Abdullah’ın vefat eden Mehmed Efendi’nin terekesinden alacağı olduğu Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Şeyh Resmî mahallesinde Emine Hatun bt. Hüseyin’in menziline varıp zeyl-i vesîkada isimleri mastûr Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Çerâğī Hamza mahallesinde sâkine olup zâtı zikr olunan Çerâğī Hamza mahallesinden Ahmed Çelebi b. Süleyman ve Mahmud Çelebi b. Mustafa ta‘rîfleriyle mu‘arrefe olan hâfızü’l-kitâb Gonca bt. Abdullah nâm hatun meclis-i ma‘kūd-ı mezbûrda mahalle-i mezbûre Şeyh Resmî ahâlîsinden olup vilâyet-i Rumeli’nde Karasu Yenicesi kazâsı nâibi iken bundan akdem vefât eden Mehmed Efendi b. Ahmed [b.] Nebi’nin sagīr oğlu Abdullah’ın vâlidesi ve tesviye-i umûruna kıbel-i şer‘den mansûbe vasiyesi olmağla terekesine vâzı‘u’l-yed olup zâtları mu‘arrifân-ı mezbûrân ta‘rîfleriyle mu‘arrefe olan mezbûre Emine ile müteveffâ-yı mezbûrun vâlidesi Sâkine Hatun bt. Ebubekir mahzarlarında üzerlerine da‘vâ ve takrîr-i kelâm edip müteveffâ-yı mezbûr Mehmed Efendi b. Ahmed b. Nebi fevtinden sekiz sene mukaddem seksen aded yaldız altını ikrâz ve teslîm ve ol dahi ber-vech-i muharrer iktirâz ve tesellüm ve mesârifine sarfla istihlâk edip hattâ meblağ-ı merkūm cihet-i merkūmeden zimmetinde bana edâsı vâcib deynini kazâ-i mezbûra gitmezden mukaddem alâ-ruûsi’l-istişhâd ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl mezbûretân Emine ve Sâkine tereke-i müteveffâ-yı mezbûra vech-i muharrer üzere vaz‘-ı yedlerini ikrâr ve müdde‘iye-i mezbûrenin vech-i muharrer üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mu‘arref-i mezbûr Ahmed Çelebi b. Süleyman ve zikr olunan Şeyh Resmî mahallesinde sâkin Receb Efendi b. Halil nâm kimesneler li-ecli’ş-şehâde meclis-i ma‘kūd-ı mezkûra hâzırîn olup isre’l-istişhâd fi’l-vâki‘ müteveffâ-yı mezbûr Mehmed Efendi b. Ahmed b. Nebi zikr olunan Karasu Yenicesi kazâsına gitmezden mukaddem işbu müdde‘iye-i mezbûre Gonca nâm hatuna cihet-i mezbûreden seksen yaldız altını zimmetinde vâcibü’l-edâ deynimdir deyü huzûrumuzda kirâren ve mirâren ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mahmud b. Mustafa ve Mehmed b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 23 min-Cumâdelûlâ sene 1110. Şuhûdü’l-hâl: es-Seyyid Hüseyin Efendi b. es-Seyyid İsmail, Ali Efendi b. Hüseyin, Süleyman Efendi b. Mehmed, Ahmed b. Hızır