Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 708 Hüküm no: 566 Orijinal metin no: [131b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Kapudan’ın kalan borcunu Pehlivan Osman’ın varislerine ödemesi Mahmiye-i İstanbul’da Altıboğça mahallesinde sâkin iken bundan akdem vefât eden Pehlivan el-Hâc Osman b. İbrahim’in verâseti zevce-i metrûke[si] Âişe bt. Abdullah ile sulbî kebîr oğulları el-Hâc Mustafa ve Ahmed Çelebi ve kebîre kızları Havva ve Fâtıma ve Hadîce’ye münhasıra olup ba‘dehû mezbûr el-Hâc Mustafa vefât edip [132a] verâseti zevce-i metrûkesi diğer Havva Hatun bt. Osman’a ve kebîre kızı diğer Fâtıma ve li-eb karındaşları merkūmûn Ahmed Çelebi ve Havva ve Fâtıma ve Hadîce’ye münhasıra olup ba‘dehû mezbûre Havva dahi vefât edip zevc-i metrûku el-Hâc Mehmed b. İbrahim ve vâlidesi mezbûre Âişe Hatun ve li-eb karındaşları merkūmûn Ahmed Çelebi ve Fâtıma ve Hadîce’ye münhasıra olduğu şer‘an zâhir ve mütehakkık oldukdan sonra mezbûrân Ahmed Çelebi ve el-Hâc Mehmed asâleten ve mezbûre Fâtıma Hatun’un zevci tarafından husûs-ı âti’l-beyânda vekâleten ve mezbûre Hadîce’nin zevci ve kezâlik tarafından vekîli olduğu mezbûrânın şehâdetleri ile sâbit ve mahkûmun-bih olan Hüseyin Çelebi b. Hasan vekâleten meclis-i şer‘de hâlâ Tersâne-i âmirede Vardiyanbaşı Mehmed Kapudan b. Mehmed mahzarında üzerine da‘vâ ve takrîr-i kelâm edip işbu hüccet-i şer‘iyye mûcebince müteveffâ-yı evvel mezbûr el-Hâc Osman’ın mezbûr Mehmed Kapudan zimmetinde beynlerinde ma‘lûm esîrler bahâsından bin altı yüz guruş hakkı olup hayâtında meblağ-ı mezbûrun iki yüz guruşunu istîfâ ve kabz edip ve ba‘de [ve]fâtihî yedi yüz guruşunu cümle veresesi hayâtda iken ahz u kabz ettiklerinden sonra ancak yedi yüz guruşu mezbûr Mehmed Kapudan’ın zimmetinde bâkī kalmağın hâlâ taleb ederiz suâl olunsun dediklerinde gıbbe’s-suâl mezbûr Mehmed Kapudan cevâbında hüccet mûcebince kazıyye vech-i muharrer [üzere] olduğunu ikrâr lâkin yedinde olan işbu derkenâr nâtık olduğu üzere meblağ-ı bâkī-yi mezbûrun mezbûr el-Hâc Mustafa hayâtında asâleten ve karındaşları merkūmûn Ahmed Çelebi ve Havva ve Fâtıma ve Hadîce taraflarından vekâleten taleb eyledikde ben dahi meblağ-ı bâkī-yi merkūmun üç yüz otuz guruşunu Tersâne Emîni Yusuf Efendi b. Abdullah’a havâle-i sahîha ile havâle ve her biri ba‘de’l-kabûl mezbûr el-Hâc Mustafa asâleten ve vekâleten bin yüz Zilhiccesi’nin on beşinci gününde emîn-i mezbûr tarafından Sergi Emîni olan Arslan Mehmed Ağa yedinden meblağ-ı mezbûr üç yüz otuz guruşu ahz u kabz etmekle ancak yetmiş yedi buçuk guruş deynim kalmışdır deyü meblağ-ı bâkī-yi mezbûrun ol mikdârını def‘le mukābele edicek gıbbe’l-istintâk müdde‘iyûn-ı mezbûrûn cevâblarında mezbûr el-Hâc Mustafa hayâtında sâir verese taraflarından vekîl olduğunu ve meblağ-ı mezbûr ber-vech-i muharrer ahz u kabzını inkâr edicek mezbûr Mehmed Kapudan’dan def‘-i meşrûhuna beyyine taleb olundukda medîne-i Eyüb’de Takyecibaşı mahallesinde sâkin Mehmed Efendi b. Hasan ve kasaba-i Kasımpaşa’da Yeldeğirmeni mahallesinden Mustafa Çavuş b. Musa li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr el-Hâc Mustafa b. Osman b. İbrahim hayâtında asâleten ve sâir verese taraflarından vekîlim deyü meblağ-ı bâkī-i mezbûrun üç yüz otuz guruşu bi-tarîkı’l-havâle vech-i meşrûh üzere Sergi Emîni Arslan Mehmed Ağa’dan târîh-i mezbûrda bizim huzûrumuzda ahz u kabz eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın ebnâ-yı mezbûr Mehmed Kapudan’dan mezbûr el-Hâc Mustafa’nın vekâlet-i mezbûresine beyyine taleb olundukda ityân içün istimhâl etmekle mehl-i şer‘î verilip müddet-i mehl münkazıye oldukdan sonra ityân-ı beyyineden ızhâr-ı acz edip istihlâf etmeğin fi’l-hakīka mezbûr el-Hâc Mustafa hayâtında husûs-ı mezbûra tevkîl etmeyip hisselerini kabzını muhil almadıklarına mezbûrân Ahmed Çelebi ve el-Hâc Mehmed’e ve müvekkiletân-ı mezbûretân Fâtıma ve Hadîce’ye taraf-ı şer‘den hasımları muvâcehesinde yemîn teklîf olundukda her biri dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince meblağ-ı mezbûr üç yüz otuz guruşdan merkūm el-Hâc Mustafa’nın hissesi olan on bir bin üç yüz otuz dört sağ akçe sâkıt olmağla meblağ-ı bâkī-yi mezbûr dört yüz yedi buçuk guruşdan bâkī kalan otuz yedi bin beş yüz seksen altı sağ akçeyi verese-i merkūmûna edâya merkūm Mehmed Kapudan’a ba‘de’t-tenbîh mâ-vaka‘a kayd şüd. Fî 20 min-Cumâdelûlâ sene 1110. Şuhûdü’l-hâl: Ali Çavuş el-mübâşir, Çukacı el-Hâc Süleyman, Çukadâr el-Hâc Süleyman b. Abdullah, Üveys Mehmed Efendi b. İbrahim, Uşşâkī Mehmed Efendi, Mukayyid Ali Nükâtî Efendi, Ahmed Çelebi b. Süleyman, el-Hâc Hüseyin Efendi