Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 712 Hüküm no: 569 Orijinal metin no: [132b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Ağa’nın hanımı Ümmühani’nin terekeden mehir talebi Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘den irsâl olunan Mevlânâ Ahmed Şeyhî Efendi mahmiye-i İstanbul’da İshak Paşa mahallesinde sâkin iken bundan akdem vefât eden Macar Hasan Ağa b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkeleri Bağıcinan bt. Abdullah ve Ümmühani bt. Abdullah ile sagīr oğlu Hasan’a münhasıra oldukdan sonra mezbûre Ümmühani bt. Abdullah ba‘de’t-ta‘rîfi’ş-şer‘î meclis-i ma‘kūd-ı mezbûrda sagīr-i mezbûrun tesviye-i umûruna vasiyy-i muhtârı olan Hüseyin Ağa b. Mahmud mahzarında üzerine da‘vâ ve takrîr-i kelâm edip zevcim müteveffâ-yı mezbûr Macar Hasan Ağa b. Abdullah tezevvüc murâd eyledikde seksen guruş mehr-i müeccel tesmiyesiyle beni huzûr-ı Müslimînde tezevvüc ve kabûl edip hattâ kemâl-i hâl-i sıhhatinde fevtinden bir ay mukaddem cihet-i mezbûreden zimmetinde bana reddi vâcib ol kadar guruş deyni olduğunu huzûr-ı Müslimînde ikrâr ve işhâd dahi edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Ayasofya-i kebîr mahallesinde sâkin İbrahim b. Muharrem ve medîne-i Üsküdar’da Vâlide Sultan mahallesinde sâkin Mehmed Ağa b. Hasan li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Macar Hasan Ağa b. Abdullah hâl-i kemâl-i sıhhatinde fevtinden bir ay mukaddem zevcem işbu müdde‘iye-i mezbûre Ümmühani bt. Abdullah zimmetinde reddi vâcib seksen guruş mehr-i müeccel deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr el-Hâc Süleyman b. Abdullah ve Ahmed Çelebi b. Süleyman ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 15 min-Cumâdelûlâ sene 1110. Şuhûdü’l-hâl: Hasan Efendi b. Mahmud, Mustafa Çavuş b. Ali, Hüseyin Çelebi b. Mehmed, Hüseyin Çelebi b. Hasan