Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 713 Hüküm no: 570 Orijinal metin no: [132b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Ağa’nın hanımı Bağıcinan’ın terekeden alacağını talep ettiği Kezâlik mezbûre Bağıcinan bt. Abdullah meclis-i ma‘kūd-ı mezbûrda sagīr-i mezbûrun tesviye-i umûruna vasiyy-i muhtârı olan mezbûr Hüseyin Ağa mahzarında üzerine da‘vâ ve takrîr-i kelâm edip zevcem müteveffâ-yı mezbûr Hasan Ağa târîh-i kitâbdan otuz sene mukaddem tezevvüc murâd eyledikde beş bin sağ akçe mehr-i müeccel tesmiyesiyle huzûr-ı Müslimînde beni tezevvüc ve kabûl edip ve kıymetleri beynimizde ilm-i şer‘î ile ma‘lûm eşyâ-i mütenevvi‘a bahâsından yüz guruş dahi hakkım olup hattâ hâl-i kemâl-i sıhhatinde fevtinden bir ay mukaddem ciheteyn-i mezbûreteynden zimmetinde bana reddi vâcib deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı Müslimînden mahmiye-i mezbûrede Ayasofya-i kebîr mahallesinden İbrahim b. Muharrem ve Üsküdar’da Vâlide Sultan mahallesinden Mehmed Ağa b. Hasan li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Macar Hasan Ağa b. Abdullah hâl-i kemâl-i sıhhatinde fevtinden bir ay mukaddem ciheteyn-i mezbûreteynden müdde‘iye-i mezbûra zimmetimde reddi vâcib beş bin sağ akçe mehr-i müeccel ile eşyâ-i mütenevvi‘a semenlerinden dahi yüz guruş deynim vardır deyü huzûrumuzda ikrâr ve bizi işhâd eyledi, biz bu husûsa ilâ-âhirihî. Hurrire fi’t-târîhi’l-mezbûr li-seneti’l-merkūme. Şâhidûnü’s-sâbikūn