Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 716 Hüküm no: 574 Orijinal metin no: [133a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Ağa’dan oğlu Hüseyin’e kalan tımarın işlemleri için harcanan paranın terekeden ödendiği Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen Ahmed Şemsi Efendi irsâl olunup ol dahi mahmiye-i İstanbul’da İshak Paşa mahallesinde sâkin iken bundan akdem vefât eden Macar Hasan Ağa b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde Dergâh-ı âlî çavuşlarından Mustafa Çavuş b. Ali meclis-i ma‘kūd-ı mezbûrda müteveffâ-yı mezbûrun sagīr oğlu Hüseyin’in tesviye-i umûruna vasiyy-i muhtârı olan Hüseyin Ağa b. Mahmud mahzarında üzerine da‘vâ ve takrîr-i kelâm edip müteveffâ-yı mezbûrun Saruhan sancağında olup derûn-ı? hüccetde? olan timârı sagīr-i mezbûr Hüseyin’in üzerine tevcîh olunması’çün vasiyy-i mezbûr ma‘rifetiyle ve izn-i şer‘le sagīr-i mezbûru oraya götürüp ba‘dehû Kapudan Paşa hazretlerine Boğazhisar-ı mezbûra varıp gelince harcırâh ve ücret-i devâb ve tezkere harcı ve berât harcı cem‘an elli iki guruş ile ücretim olan yirmi beş guruşu sagīr-i mezbûrun mal-ı müntakilinden olmak üzere vasiyy-i mezbûr Hüseyin Ağa yedinden ba‘de’t-tenbîhi’ş-şer‘î tamâmen ahz u kabz eyledim dedikde vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr el-Hâc Süleyman b. Abdullah ve Ahmed b. Süleyman ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. 15 min-Cumâdelûlâ sene 1110. Şuhûdü’l-hâl: Hasan Efendi b. Mahmud, Mehmed Ağa b. Hasan, İbrahim Çelebi b. Ali, Hasan Çelebi b. Hüseyin