Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 715 Hüküm no: 573 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Hüseyin Ağa’nın terekesinden mehir talebi ve küçük kızı Hatice’ye nafaka takdiri Mahmiye-i İstanbul’da Şeyh Ebulvefâ mahallesi ahâlîsinden iken bundan akdem medîne-i Belgrad’da vefât eden Hüseyin Ağa b. İbrahim b. Abdullah’ın zevce-i menkûha-i metrûkesi olup zâtı mahalle-i mezbûreden Ahmed b. Mustafa ve Hasan b. Abdullah ta‘rîfleriyle mu‘arrefe olan hâfızü’l-kitâb Âişe Hatun bt. Abdullah mahfil-i kazâda müteveffâ-yı mezbûrun sagīre kızı Hadîce’nin tesviye-i umûruna vasiyy-i muhtârı olmağla tereke-i müteveffâ-yı mezbûra vaz‘-ı yed eden Ali Bey b. Mehmed mahzarında da‘vâ ve takrîr-i kelâm edip müteveffâ-yı mezbûr Hüseyin Ağa b. İbrahim b. Abdülkerim bin yüz bir senesinde para üç akçe hesâbı üzere üç bin akçe mehr-i müeccel tesmiyesiyle mahzar-ı Müslimînde beni kabûl ve tezevvüc edip hattâ mehr-i mezbûr ile beni tezevvüc eyledikde medîne-i Belgrad’da huzûr-ı Müslimînde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Debbâğ Yunus mahallesinden Abdullah Ağa b. Mehmed ve Mustafa Ağa b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Hüseyin Ağa b. İbrahim b. Abdülkerim medîne-i Belgrad’a gider oldukda işbu müdde‘iye-i mezbûre Âişe Hatun’u her bir para üç akçe hesâbı üzere üç bin akçe mehr-i müeccel tesmiyesiyle yüz bir senesinde tezevvüc ve kabûl eyledim deyü huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb kayd şüd. Fî selhi min-Cumâdelûlâ sene 1110. Şuhûdü’l-hâl: Abdurrahman Efendi b. Hüseyin, Halil Efendi b. İbrahim, Hasan Ağa b. İbrahim, Hasan Çelebi b. Abdürrahim Sagīr-i mezbûrun vasiyy-i muhtârı olan mezbûr Ali Bey b. Mehmed talebiyle târîh-i kitâbdan beher yevm dört para nafaka farz ve takdîr olduğu bu mahalle kayd şüd. Fi’t-târîhi’l-mezbûr li-seneti’l-mezbûre. Şuhûdü’l-hâl: Abdürrahim Efendi b. Hüseyin, Halil Efendi b. İbrahim, Hasan Ağa b. İbrahim, Hasan Çelebi b. Abdürrahim