Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 718 Hüküm no: 576 Orijinal metin no: [133b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Surre Emini Mehmed Ağa’nın çocuklarına anneleri Rukiye’nin vasi tayin edilip çocuklara da nafaka takdir edildiği Mahmiye-i İstanbul’da Süleymaniye kurbünde Bezzâz-ı cedîd mahallesi ahâlîsinden iken bundan akdem vedâ‘-ı âlem-i fânî eden Emîn-i Surre el-Hâc Mehmed Ağa b. Şa‘bân’ın evlâd-ı sıgārı Ahmed Çelebi ve İsmail Çelebi ve Âişe’nin tesviye-i emrlerine kıbel-i şer‘-i enverden bir vasî nasbı lâzım ve mühim olmağın emânet ve diyânet ile ma‘rûfe olduğu zeyl-i vesîkada muharrerü’l-esâmî Müslimîn haberleri ile lede’ş-şer‘i’l-enver zâhir ve mukarrer olan zikr olunan sagīrlerin vâlideleri bâ‘isetü’l-kitâb Rukiye Hatun bt. Abdullah’ı hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri vasî ve üzerine mahalle-i mezbûre sükkânından el-Hâc Mustafa b. İbrahim ve Hammâmî Mehmed Ağa b. Abdülbaki nâm kimesneleri nâzır-ı hasbî nasb ü ta‘yîn buyurduklarında onlardan her biri vesâyet ve nezâret-i mezbûreyi ba‘de’l-kabûl merkūme Rukiye Hatun meclis-i şer‘de takrîr-i kelâm edip vasiyeleri olduğum sıgār-ı mezbûrînin babaları müteveffâ-yı mezbûrdan intikāl-i âdî ile intikāl edip mahmiye-i mezbûrede Suluhan demekle ma‘rûf evkāf akārları icârâtından her birine kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasiye-i mezbûrenin kelimât-ı meşrûhası vâkı‘a mutâbıka olduğunu hâkim-i mûmâ-ileyh hazretleri han-ı mezbûr icârâtından târîh-i kitâbdan her birine yevmî kırkar sağ akçe nafaka ve kisve-bahâ farz ve takdîr edip meblağ-ı mefrûz-ı mezbûru levâzım-ı sıgār-ı mezbûrîne harc ü sarfa ve vakt-i zarûretde istidâneye ve lede’z-zafer mallarına rücû‘a vasiye-i mezbûreye izin birle mâ-vaka‘a bi’t-taleb kayd şüd. Fî gurre-i Cumâdelûlâ li-sene aşer ve mi’e ve elf. Şuhûdü’l-hâl: Mehmed Ağa b. Şa‘bân, Rif‘atî Ali Efendi b. Yusuf, Nasuh Beşe b. Yusuf, İbrahim Çelebi b. Mehmed, Uşşâkī Mehmed Çelebi, Süleyman Çelebi b. Ahmed ve gayruhum mine’l-huzzâr