Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 719 Hüküm no: 577 Orijinal metin no: [133b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın hayatta iken çocukları üzerine Ali Bey’i vasi tayin ettiği Mahmiye-i İstanbul’da Şeyh Ebulvefâ mahallesi ahâlîsinden olup medîne-i Belgrad’da vefât eden Hüseyin Ağa b. İbrahim b. Abdülkerim’in sulbiye sagīre kızı Hadîce’nin tesviye-i umûruna ve müteveffâ-yı mezbûrun zevce-i menkûha-i metrûkesi Âişe Hatun bt. Abdullah’ın batnında mütebeyyin hamlin hisse-i mevkūfesini zabt ve hıfza vasiyy-i muhtârı olduğunu iddi‘â eden hâfızü’l-kitâb Ali Bey b. Mehmed mahfil-i kazâda müteveffâ-yı mezbûrun terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan mezbûre Âişe Hatun mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Ağa b. İbrahim b. Abdülkerim fevtinden üç gün mukaddem sagīre-i mezbûrenin tesviye-i umûruna ve haml-i mezbûrun hisse-i mevkūfesini zabt ve hıfza beni gıyâbımda vasiyy-i muhtâr nasb ü ta‘yîn ve musırran-aleyhâ fevt olup haber-i vesâyet bana vâsıl oldukda ben dahi ba‘de’l-kabûl sagīre-i mezbûrenin ber-mûceb-i defter-i kassâm-ı askerî hisse-i şer‘iyyesini ve haml-i mezbûrun hisse-i mevkūfesini zabt ve hıfz murâd eylediğimde mezbûre Âişe Hatun mâni‘ olur suâl olunsun dedikde gıbbe’s-suâl mezbûre Âişe Hatun cevâbında tereke-i müteveffâ-yı mezbûra vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden sâbıkā Başdefterdâr olan Halil Paşa’nın etbâ‘ından olup hâlâ mahmiye-i mezbûrede Elçihanı’nda müsâfiren sâkin Ömer Bey b. Receb ve Mustafa Bey b. Hasan li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Hüseyin Ağa b. İbrahim b. Abdülkerim hâl-i marazında fevtinden üç gün mukaddem sagīre kızı mezbûre Hadîce’nin tesviye-i umûruna ve haml-i mezbûrun hissenini zabt u hıfza bizim huzûrumuzda işbu müdde‘î-i mezbûr Ali Bey b. Mehmed’i gıyâbında vasiyy-i muhtâr nasb ü ta‘yîn ve musırran-aleyhâ fevt olup haber-i vesâyet müdde‘î-i mezbûra vâsıl oldukda ol dahi vesâyet-i mezbûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb şüd. Fî selhi Cumâdelûlâ sene 1110. Şuhûdü’l-hâl: Abdullah Ağa b. Mehmed, Mustafa Ağa b. Mehmed, İbrahim Ağa b. Ahmed, İbrahim Çelebi b. Mehmed, Mehmed Çavuş b. Abdurrahman