Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 725 Hüküm no: 581 Orijinal metin no: [134b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin oğlu Abdullah’a nafaka takdiri Mahmiye-i İstanbul’da Şeyh Resmî mahallesi ahâlîsinden olup vilâyet-i Rumeli’nde Karasu Yenicesi kazâsı nâibi iken bundan akdem vefât eden Mehmed Efendi b. Ahmed’in sulbî oğlu Abdullah nâm sagīrin vâlidesi ve hâdinesi ve tesviye-i umûruna kıbel-i şer‘den mansûbe vasiyesi işbu hâfızatü’l-kitâb Emine bt. Hüseyin nâm hatun ba‘de’t-ta‘rîfi’ş-şer‘î meclis-i şer‘de bi’l-vesâye takrîr-i kelâm edip oğlum sagīr-i mezbûrun nafaka ve kisveye eşedd-i ihtiyâcı olmağla mal-ı müntakilinden kadr-ı ma‘rûf nafaka ve kisve-bahâ kıbel-i şer‘den farz ve takdîr olunmak matlûbumdur dedikde vasiyy-i mezbûrenin kelimât-ı meşrûhası vâkı‘a mutâbıka olmağın hâkim-i muvakkı‘-ı sadr-ı kitâb efendi hazretleri sagīr-i mezbûrun nafaka ve kisve ve sâir levâzım-ı zarûriyesi içün târîh-i kitâbdan yevmî beş para-i Mısriye farz ve takdîr edip meblağ-ı mefrûz-ı mezbûru levâzım-ı sagīr-i mezbûra harc ü sarfa ve vakt-i hâcetde istidâneye ve lede’z-zafer malına rücû‘a vasiye-i mezbûra izin vermeğin mâ-vaka‘a kayd şüd. Fî 23 Cumâdelûlâ sene 1110. Şuhûdü’l-hâl: Receb Efendi b. Halil, Hüseyin Çelebi b. Halil, Mahmud Çelebi b. Mustafa, el-Hâc Osman b. İsmail