Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 725 Hüküm no: 582 Orijinal metin no: [134b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vefat eden eşi Mehmed Efendi’nin terekesinden mehrini alması Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Şeyh Resmî mahallesinde Emine Hatun bt. Hüseyin’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i mezbûre ahâlîsinden olup vilâyet-i Rumeli’nde Karasu Yenicesi nâibi iken bundan akdem vefât eden Mehmed Efendi b. Ahmed’in verâseti zevce-i metrûkesi mezbûre Emine Hatun ile vâlidesi Sâkine bt. Ebubekir’e ve sagīr oğlu Abdullah’a münhasıra oldukdan sonra zâtı babası mezbûr Hüseyin b. Halil ve Mahmud Çelebi b. Mustafa ta‘rîfleriyle mu‘arrefe olan mezbûre Emine meclis-i mezbûrda tereke-i müteveffâ-yı mezbûra bi’l-verâse vaz‘-ı yed edip zâtı mu‘arrifân-ı mezbûrân ta‘rîfleriyle mu‘arrefe olan mezbûre Sâkine mahzarında üzerine da‘vâ edip müteveffâ-yı mezbûr Mehmed Efendi b. Ahmed beni fevtinden seksen iki ay mukaddem on bin sağ akçe mehr-i müeccel ile tezevvüc ve kabûl edip akd-i nikâh beynimizde kāim iken kable’l-edâ fevt olmağla taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden Çerâğī Hamza mahallesi İmâmı Mehmed Efendi b. Ahmed ve Şeyh Resmî mahallesinden Receb Efendi b. Halil li-ecli’ş-şehâde meclis-i mezbûra hâzırân olup isre’l-istişhâd fi’l-hakīka müteveffâ-yı mezbûr bundan seksen iki ay mukaddem on bin akçe mehr-i müeccel tesmiyesiyle müdde‘iye-i mezbûreyi huzûrumuzda tezevvüc ve kabûl edip akd-i nikâh beynlerinde kāim iken vefât eyledi, biz bu husûsa ilh. mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Ahmed b. Şa‘bân ve Mehmed b. Ali ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 3 Cumâdelûlâ sene 1110. Şuhûdü’l-hâl: Abdullah Çelebi b. (°), Hasan Efendi, Ahmed Efendi, İbrahim Efendi b. Ahmed, Mehmed Çelebi b. Abdullah