Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 726 Hüküm no: 583 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un vasiyetini yerine getirmek üzere Davud Çelebi’yi vasi tayin ettiği Husûs-ı âti’l-beyânın mahallinde ketb ü tahrîri içün bi’t-taleb irsâl olunan Emin Mehmed Efendi b. Ârif Mehmed Efendi mahmiye-i İstanbul’da Müftü Ali Çelebi mahallesinde sâkine Rukiye Hatun bt. Abdullah’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde zâtı Hasan Ağa b. Ali ve el-Hâc İsmail b. Ali ta‘rîfleriyle mu‘arrefe olan Râbia Hatun bt. Ramazan b. Müstecib meclis-i ma‘kūd-ı mezbûrda bâ‘isü’l-kitâb Davud Çelebi b. Ali mahzarında ikrâr ve takrîr-i kelâm edip işbu kırk miskāl bir çift altın bilezik ve bir çift zümrüd küpe ve bir mücevher ön kuşak ve otuz hurda altın düğme ve yirmi vasat altın düğme ve bir kakum kürk ve bir paça kürk ve beş hatâî kaftan ve anteri ve yedi kadife yasdık ve beş minder ve dört çuka mak‘ad ve bir orta keçesi ve bir yan keçesi ve üç tencere ve üç yemenî yorgan ve bir leğen ibrik ve el-Hâc Ali zimmetinde cihet-i deynden hakkım olan üç yüz guruşdan mâ‘adâ ismi mal ıtlâk olunur bir şeyim olmamağla bi-emrillâhi te‘âlâ fevtimden sonra eşyâ-i muharrere-i mezkûrenin sülüsü ifrâz olunup sülüs-i mezkûrdan otuz guruş ıskāt-ı salâtım olunup bir mikdârıyla bir hatm-i şerîf ve yetmiş bin kelime-i tevhîd ettirilip sevâbı rûhuma ihdâ oluna ve bir seneye dek tabh-ı ta‘âm ve it‘âm-ı fukarâ ve sulehâ oluna sülüs-i mezkûrdan fazla kalırsa mezbûr Davud Çelebi’nin re’yiyle vücûh-ı birr ü hayra sarf oluna deyü vasiyet ve tenfîzine mezbûr Davud Çelebi’yi vasiyy-i muhtâr nasb ü ta‘yîn eyledim dedikde ol dahi vesâyet-i mezbûreyi kabûl ve merâsimini edâya ta‘ahhüd etmeğin vâki‘ hâli mevlânâ[-yı mezbûr] tahrîr ma‘an mürsel Ahmed b. Süleyman ve Osman b. Mustafa ile meclis-i şer‘de takrîr etmeğin mâ-vaka‘a kayd şüd. Fî Zilka‘de li-sene tis‘a ve mi’e ve elf. Şuhûdü’l-hâl: Ahmed Efendi b. Mehmed, Mehmed Efendi b. Mehmed, es-Seyyid Mustafa Efendi, es-Seyyid Abdülbaki Çelebi, Hasan Ağa b. Ali