Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 730 Hüküm no: 586 Orijinal metin no: [135b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hac yolunda vefat eden İbrahim Çavuş’un mallarını getiren Halil Çavuş ile varisler arasındaki davaya sulh bedeli karşılığı son verildiği Mahmiye-i İstanbul’da Ali Paşa-i atîk ahâlîsinden olup işbu sene-i mübârekede hacc-ı şerîfden gelir iken esnâ-i tarîkde Yakob korusu nâm merhalede vefât eden sâdât-ı kirâm çavuşlarından es-Seyyid İbrahim Çavuş b. es-Seyyid Mehmed’in verâseti zevce-i metrûkesi Mihriban Safiye bt. Abdullah ile li-eb kız karındaşı Şerife Fermane Hatun ve li-eb karındaşı olup vilâyet-i Rumeli’nde Osman Pazarı kazâsına tâbi‘ Torbacılar nâm karyede sâkin es-Seyyid Himmet’e münhasıra oldukdan sonra husûs-ı âti’l-beyânın mahallinde tahrîri iltimâs olunmağın savb-ı şer‘den irsâl olunan Mevlânâ es-Seyyid Abdülmuti Efendi müteveffâ-yı mezbûrun hayâtında mahalle-i mezbûrede sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde zâtı ta‘rîf-i şer‘î ile mu‘arrefe olan mezbûre Mihriban Hatun asâleten ve mezbûre Şerife Fermane Hatun’un oğlu ve tarafından husûs-ı âti’l-beyâna vekîl-i müsecceli olup ve gāib-i mezbûr es-Seyyid Himmet’in hüccet-i şer‘iyye ile vasiyy-i mansûbu olan es-Seyyid Halil Çavuş b. es-Seyyid Ramazan vekâleten ve vesâyeten meclis-i ma‘kūd-ı mezbûrda müteveffâ-yı mezbûrun tarîk-i hacda hizmetinde olmağla terekesine bi’l-emâne vaz‘-ı yed eden es-Seyyid el-Hâc Halil Çelebi b. es-Seyyid Mehmed mahzarında her biri ikrâr-ı tâm ve takrîr-i kelâm edip mezbûr el-Hâc Halil yedinde olan tarîk-i hac defteri ve Şam defteri mûceblerince müteveffâ-yı mezbûrun mecmû‘ malından ba‘de ihrâci’l-mesârif Sahhe’l-bâkī makbûzu olan iki yüz kırk beş guruş ve hâric ez-defter yedinde kalan iki lâciverd şalî ve bir top yemenî ve bir künk? ...? ...? meclisde def‘ ü teslîm biz dahi yedinden tamâmen ahz u kabz eyledik lâkin defterlerden hâric yüz yaldız altını ve bir re’s bargir ve bir sîm sâ‘ati sen ketm ü ihfâ eyledin deyü mezbûr el-Hâc Halil’den taleb ve da‘vâ ettiğimizde ol dahi cevâbında müteveffâ-yı mezbûr hayâtında tarîk-i hacda kendüye teslîm, mukābelesinde zikr olunan yüz yaldız altını ve bargir ve sâ‘ati bana hîbe-i sahîha ile hîbe ve teslîm ben dahi meclis-i hîbede ittihâb ve kabz etmekle mülk-i mevhûbum olmuşdur deyü def‘le mukābele edip def‘-i mezkûrunu isbât içün şuhûd ikāmet etmekle sulh gāib-i mezbûr hakkında dahi enfa‘ olduğuna binâen beynimizde ba‘de’ş-şer‘ muslihûn tavassut edip mezbûr el-Hâc Halil bizimle yetmiş beş guruş üzerine sulh oldukda biz dahi sulh-ı mezbûru ba‘de’l-kabûl bedel-i sulh-ı mezbûr yetmiş beş guruşu dahi mezbûr el-Hâc Halil yedinden tamâmen ahz u kabz eyledik, husûs-ı mezbûra müte‘allıka âmme-i da‘vâdan asâleten ve vekâleten mezbûr el-Hâc Halil’in zimmetini ibrâ-i âm ile ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 15 sene 1111. Şuhûdü’l-hâl: Seydi Mehmed Efendi, Hüseyin Efendi el-imâm, es-Seyyid Ali Ağa ser-çavuşân-ı eşrâf, es-Seyyid Mustafa mukayyid-i çavuş, Seyyid Mehmed Çavuş b. Abdullah, Seyyid Mehmed b. Seyyid Ebubekir Çavuş, Müezzin Mehmed Çelebi b. Ahmed, Halil Beşe b. Hasan, İbrahim Beşe b. Hasan