Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 731 Hüküm no: 587 Orijinal metin no: [135b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un hayatta iken evini ve eşyalarını Ali b. Abdullah’a hibe ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen ba‘s olunan Mevlânâ Mehmed Efendi b. Mahmud mahmiye-i İstanbul’da Çerâğī Hamza mahallesinde el-Hâc Ali b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘ ettikde menzil-i mezbûrda sâkine iken bundan akdem vefât eden Hadîce Hatun bt. Mustafa b. Abdullah’ın mukırru leh bi’n-neseb cihetinden hasren vârisesi olduğu müsbet olup zâtı mahalle-i mezbûre sâkinlerinden İbrahim Çelebi b. Ali ve es-Seyyid Mustafa b. es-Seyyid Mehmed ta‘rîfleriyle mu‘arrefe olan Hâkime bt. Mehmed nâm hatun meclis-i ma‘kūd-ı mezbûrda işbu râfi‘ü’l-kitâb mezbûr el-Hâc Ali mahzarında üzerine da‘vâ ve takrîr-i kelâm edip mûrisem müteveffât-ı mezbûrenin malike olduğu işbu menzil ile dâhilinde vâki‘ iki döşek ve üç minder ve on beledî yasdık ma‘a’l-gılâf ve beş yorgan ve bir orta keçesi ve iki yan keçesi ve bir kaliçe ve iki kilim ve üç sandık ve üç tencere ve on sahan ve iki sini ve bir güğüm ve iki leğen ma‘a ibrik terekeden olmak üzere bana irsen isâbet etmişken mezbûr el-Hâc Ali bi-gayr-ı hakkın vaz‘-ı yed ve bana teslîmden imtinâ‘ eder suâl olunsun dedikde gıbbe’s-suâl mezbûr el-Hâc Ali cevâbında müteveffât-ı mezbûre Hadîce Hatun bt. Mustafa b. Abdullah hâl-i kemâl-i sıhhatinde bin yüz on Muharremi’l-harâmının dördüncü günü târîhiyle müverrah mahmiye-i mezbûrede Mahmud Paşa mahallesinde nâibü’ş-şer‘ olan umdetü’l-müderrisîni’l-kirâm Sunullah Efendi’nin imzâlı hücceti mûcebince işbu menzil-i mezbûrunu yedimde olan sâbıkā İstanbul kādısı olan fazîletlü Ataullah Efendi hazretlerinin imzâlı hücceti mûcebince [136a] bana temlîk ettiğini dâhilinde olan eşyâ-i mezkûresini bana hîbe ve teslîm ben dahi ittihâb ve tesellüm ettiğimi ve üzerine lâbise olduğu libâsdan mâ‘adâ ismi [mâl] ıtlâk olunur eşyâda alâka ve medhalim olmadığını ikrâr ve yedime işbu mûmâ-ileyh Sunullah Efendi’nin imzâlı hüccetini vermişdir [deyü] def‘le mukābele edicek gıbbe’l-istintâk ve’l-inkâr mezkûr el-Hâc Ali’den mazmûn-ı hüccete beyyine taleb olundukda zeyl-i hüccette isimleri mastûr umdetü’l-müderrisîn Şeyh Mehmed Efendi b. Ahmed Efendi ve umdetü’l-müderrisîni’l-kirâm Mustafa Efendi b. el-müvellâ el-merhûm Ahmed Efendi ve el-Hâc Rüstem b. Abdullah li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-vâki‘ şahsı rü’yetimiz ile ma‘lûmumuz olan müteveffât-ı mezbûre Hadîce Hatun bt. Mustafa b. Abdullah hâl-i kemâl-i sıhhatinde işbu bin yüz on Muharremi’l-harâmının dördüncü günü târîhiyle müverrah mûmâ-ileyh Sunullah Efendi’nin imzâlı hücceti mûcebince zikr olunan menzilini mezbûr el-Hâc Ali’ye temlîk ve dâhilinde olan eşyâ-i muharrere-i mezkûresini mezbûr el-Hâc Ali’ye hîbe ve teslîm ol dahi ittihâb ve kabûl ve kabz ve üzerinde lâbise olduğu libâsından mâ‘adâ ismi mal ıtlâk olunur eşyâda alâka ve medhalim olmadığını huzûrumuzda ikrâr ve hüccet-i mezbûresini mezbûr el-Hâc Ali’ye def‘ eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müdde‘iye-i mezbûra bî-vech mu‘ârazadan men‘ olundukdan sonra müdde‘iye-i mezbûra meclis-i ma‘kūd-ı mezbûrda merkūm el-Hâc Ali mahzarında ikrâr ve takrîr-i kelâm edip mûrisem müteveffât-ı mezbûrenin lâbise olduğu libâsından ancak işbu otuz miskāl bir altın ön kuşak ve bir yorgan ve bir sandal yorgan ve bir anteriyi mezbûr el-Hâc Ali yedinden ahz u kabz eyledim, tereke-i müteveffât-ı mezbûr el-Hâc Ali’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Ahmed b. Süleyman ve Mehmed b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 13 min-Cumâdelûlâ sene 1110. Şuhûdü’l-hâl: Umdetü’l-müderrisîn el-Hâc Mehmed Efendi b. Ahmed, el-Hâc Mustafa Efendi b. Abdurrahman, Muharrem Efendi b. Mehmed, diğer Mehmed Efendi b. Mehmed, Hasan Efendi b. Osman, Hasan Efendi b. Hüseyin, Mehmed Efendi b. Osman, el-Hâc Veli b. Eyüb, Hüseyin b. Abdullah