Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 735 Hüküm no: 591 Orijinal metin no: [136b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın hanımları Bağıcinan ve Ümmühani’nin terekeden haklarını aldıkları Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Ahmed Şemsi Efendi mahmiye-i İstanbul’da İshak Paşa mahallesinde sâkin iken bundan akdem vefât eden Macar Hasan Ağa b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkeleri Bağıcinan bt. Abdullah ve Ümmühani bt. Abdullah ile sagīr oğlu Hasan’a münhasıra oldukdan sonra mezbûre Bağıcinan bt. Abdullah ba‘de’t-ta‘rîfi’ş-şer‘î meclis-i ma‘kūd-ı mezbûrda vasiyy-i muhtârı olmağla terekesine vaz‘-ı yed eden Hüseyin Ağa b. Mahmud mahzarında ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de ihrâci’l-mesârif ve’d-düyûn ve’s-sülüs nısf sümün hisseme isâbet eden iki bin altı yüz elli dokuz akçeyi îfâ-i edâsına hükmolunup yedimde olan hüccet-i şer‘iyye nâtıka olduğu üzere beş bin sağ akçe mehr-i müeccelim ile yüz guruş hakkımı müteveffâ-yı mezbûrdan olmak üzere vasiyy-i mezbûr yedinden bi’t-tamâm ahz u kabz eyleyip yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mezbûre Ümmühani Hatun meclis-i ma‘kūd-ı mezbûrda ba‘de’t-ta‘rîfi’ş-şer‘î mezbûr vasî Hüseyin Ağa b. Mahmud mahzarında ikrâr ve takrîr-i kelâm edip müteveffâ-yı mezbûrun ber-mûceb-i defter-i kassâm-ı askerî nısf sümün hisseme isâbet eden iki bin altı yüz elli dokuz akçe ile îfâ-i edâsına hükmolunup yedimde olan hüccet-i şer‘iyye nâtıka olduğu üzere seksen guruş mehr-i müeccel hakkımı tereke-i müteveffâ-yı mezbûrdan olmak üzere vasiyy-i mezbûr yedinden tamâmen ahz u kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Ahmed Çelebi b. Süleyman ve el-Hâc Süleyman b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 2 min-Cumâdelâhire sene 1110. Şuhûdü’l-hâl: Hasan Efendi b. Mahmud, Mehmed Efendi b. Hasan, İbrahim Çelebi b. Mehmed, Mustafa Çavuş b. Ali, Ahmed b. Ali