Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 737 Hüküm no: 594 Orijinal metin no: [137a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit olan Mehmed Paşa’nın çocuklarının vasisi Abdullah Ağa’ya çiftlik ve evini tamir etmesi için izin verildiği Mahmiye-i İstanbul’da Emin Sinan mahallesi ahâlîsinden olup asrında Tisa suyu ma‘rekesinden şehîden vedâ‘-ı fânî eden merhûm Mehmed Paşa b. Abdurrahman Ağa’nın sulbî sagīr oğlu Mustafa’nın ve sagīre kızı Âişe Hanım’ın tesviye-i emrlerine kıbel-i şer‘den mansûb vasîleri olan râfi‘ü’l-kitâb Abdullah Ağa b. Mehmed mahfil-i kazâda takrîr-i kelâm edip sagīrân-ı mezbûrâna babaları merhûm-ı mezbûrdan intikāl-i âdî ile intikāl eden Havâss-ı aliyye kazâsına tâbi‘ Çekmece-i sagīr kurbünde Ayamama ta‘bîr olunur vakıf çiftlik ile mahmiye-i mezbûrede Gedikpaşa kurbünde Dîvâne Ali mahallesinde vâki‘ vakıf menzilin imârete muhtâc olan mevâzi‘ine icârlarından kadr-ı ma‘rûf harc ü sarfına kıbel-i şer‘den me’zûn olmak matlûbumdur dedikde vasiyy-i mezbûr[un] kelimât-ı meşrûhası vâkı‘a mutâbık olmağın hâkim-i muvakkı‘-ı sadr-ı kitâb efendi hazretleri zikr olunan çiftlik ve menzilin imârete muhtâc olan mevâzi‘ine icârlarından kadr-ı ma‘rûf harc ü sarfa vasiyy-i mezbûra izin birle mâ-vaka‘a kayd şüd. Fî gurre-i mezbûre li-seneti’l-mezbûre. Şâhidûnü’s-sâbikūn