Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 745 Hüküm no: 600 Orijinal metin no: [138b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Süleyman’ın hayatta iken Yusuf b. Abdullah’ı azat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den Mevlânâ Şerif Mehmed Efendi irsâl olunup ol dahi mahmiye-i İstanbul’da Kaliçeci Hasan Çelebi mahallesinde sâkin iken bundan akdem vefât eden Boyacı el-Hâc Süleyman b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun verâseti zevceteyn-i menkûhateyn-i metrûketeyni Râbia Hatun bt. Abdullah ve Bahtiyar bt. Abdullah nâm hatunlara münhasıra oldukdan sonra müteveffâ-yı mezbûra rıkk-ı sâbıkını mu‘terif işbu orta boylu, kara gözlü, kara bıyıklı, Gürciyyü’l-asl Müslimetü’l-millet râfi‘ü’l-kitâb Yusuf b. Abdullah meclis-i ma‘kūd-ı mezbûrda zikr olunan sagīrlerin vâlideleri ve savb-ı şer‘den vasiye-i mansûbeleri olan mezbûre Râbia Hatun ile mezbûretân Emetullah? ve Âişe mahzarlarında üzerlerine da‘vâ ve takrîr-i kelâm edip seyyidim müteveffâ-yı mezbûr Boyacı el-Hâc Süleyman b. Mehmed b. Abdullah hâl-i kemâl-i sıhhatinde târîh-i rakamdan iki sene mukaddem huzûr-ı Müslimînde malından tahrîr ve i‘tâk ve zümre-i ahrâr-ı asiyyîne idrâc ve ilhâk etmeğin mezbûrât bana terekeden olmak üzere bi-gayr-ı hakkın vaz‘-ı yed eder suâl olunup sebîlim tahliye olunması matlûbumdur dedikde gıbbe’s-suâl ve’l-inkâr mevsûf-ı mezbûrdan müdde‘âsına beyyine taleb olundukda udûl-ı Müslimînden mahmiye-i mezbûrede Ali Paşa-i atîk mahallesinden el-Hâc Hüseyin b. Ali ve Cezerî Kasım Paşa mahallesinden Abdi b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ müteveffâ-yı mezbûr Boyacı el-Hâc Süleyman b. Mehmed b. Abdullah hâl-i kemâl-i sıhhatinde fevtinden iki sene mukaddem mevsûf-ı mezbûr Yusuf b. Abdullah’ı huzûrumuzda malından tahrîr ve i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mevsûf-ı mezbûrun sebîli tahliye olunmağın vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan İbrahim b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 24 min-şehr-i Rebî‘i’l-âhir li-sene aşer ve mi’e ve elf. Şuhûdü’l-hâl: Ahmed Çelebi b. Şa‘bân, Mustafa b. Osman, Ahmed Çelebi b. Abdullah, el-Hâc Hasan b. Ali