Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 746 Hüküm no: 601 Orijinal metin no: [138b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş’un Mustafa ve kardeşi Mehmed’den başka varisi olmadığı Fi’l-asl vilâyet-i Anadolu’da Akçaşehir kazâsına tâbi‘ Gökçeli nâm karye ahâlîsinden olup medîne-i Üsküdar’dan Reis mahallesinde sâkin vech-i âtî üzere iddi‘â-i verâset eden bâ‘isü’l-kitâb Mustafa b. Sunullah b. İslam mahfil-i kazâda vilâyet-i Rumeli’nde Semendire kazâsında müsâfiren vefât eden Mehmed Çavuş b. Ali b. İslam mahmiye-i İstanbul’da Öksüzce mahallesinde sâkin olup terekesine bi’l-emâne vaz‘-ı yed eden Mehmed Çelebi b. Halil b. Mustafa tarafından husûs-ı âti’l-beyânda husûmet ve redd-i cevâba vekîl olduğu mahmiye-i mezbûrede Tevkī‘î Cafer Çelebi mahallesinde sâkin Hüseyin Çelebi b. Mehmed ve zikr olunan Öksüzce mahallesinde sâkin Mehmed Çelebi b. el-Hâc Receb şehâdetleriyle mahzar-ı hasm-ı câhidde sâbit olup sübût-ı vekâletine hükmolunan Mehmed Ağa b. Halil mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çavuş b. Ali ile benim babam merkūm Sunullah ile li-ebeveyn karındaşlar olup anaları ismi Emine ve babaları ismi merkūm İslam ve dedeleri ismi Abdullah ve maskat-ı re’sleri karye-i mezbûre olup müteveffâ-yı mezbûrun verâseti usûbet-i nesebiye cihetinden bana ve işbu li-ebeveyn karındaşım Mehmed Beşe’ye ve karye-i mezbûrede sâkine li-ebeveyn kız karındaşı Âişe Hatun bt. Bahtiyar’a münhasıra olup zâhirde cihet-i mezbûreden terekesinin nısfına bizlerden gayrı vâris ve âhar müstahık yoğ iken terekesinin nısfı müvekkil-i merkūm Mehmed Ağa b. Halil bize teslîmden imtinâ‘ eder suâl olunsun dedikde gıbbe’s-suâl vekîl-i mezbûr Mehmed Ağa cevâbında müvekkilinin müteveffâ-yı mezbûrun terekesine bi’l-emâne vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden fi’l-asl karye-i mezbûre ahâlîsinden olup mahmiye-i mezbûrede Esirci Kemâl mahallesinde sâkin Ali Çelebi b. Mehmed Dülgerzâde mahallesinde sâkin Mehmed Beşe b. el-Hâc Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i merkūm Mustafa’nın babası merkūm Sunullah ve müteveffâ-yı mezbûr Mehmed Çavuş’un babası merkūm Yahya ile li-ebeveyn karındaşlar olup anaları ismi merkūme Emine ve babaları ismi mezbûr İslam ve dedeleri ismi merkūm Abdullah ve maskat-ı re’sleri karye-i mezbûredir, usûbet-i nesebiye cihetinden müteveffâ-yı mezbûrun terekesinin nısfına zâhirde müdde‘î-i merkūm Mustafa ile karındaşı Mehmed’den gayrı vâris ve âhar müstahık olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb şüd. Fî 25 min-Cumâdelûlâ li-sene aşer ve mi’e ve elf. Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti b. Mustafa, Rûşenî Mehmed Efendi, İbrahim Çelebi b. Süleyman, Hasan Çelebi b. Abdullah, el-Hâc Süleyman b. Abdullah çukadâr, İbrahim Çelebi b. Mehmed