Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 747 Hüküm no: 602 Orijinal metin no: [138b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un kocası Fazlullah Ağa’ya hayatta iken sattığı evin parasını almadığına dair iddiasını ispatlayamadığı Husûs-ı âti’l-beyânın mahallinde istimâ‘ ve tahrîri iltimâs olunmağın bu fakīr mahmiye-i İstanbul’da hâlâ Sadâret-i uzmâ Kāimmakāmı olan düstûr-ı mükerrem müşîr-i mufahham sa‘âdetlü Yusuf Paşa hazretlerinin Demirkapı kurbünde sâkin oldukları saraya varıp huzûr-ı âlîlerinde akd-i meclis-i şer‘-i şerîf olundukda mahmiye-i mezbûrede Nevbethâne kurbünde Dâye Hatun mahallesi ahâlîsinden olup bundan akdem vefât eden el-Hâc Fazlullah Ağa b. Ali Ağa b. Ebubekir’in zevce-i menkûha-i metrûkesi olup zâtı ta‘rîf-i şer‘î ile mu‘arrefe olan Râbia Hatun bt. Abdullah meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûke-i uhrâsı ve sagīre kızı Zeyneb’in tesviye-i umûruna kıbel-i şer‘den [139a] mansûbe vasiyesi olmağla terekesine vaz‘-ı yed eden Fâtıma Hatun bt. Abdullah b. Abdullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân Ebubekir b. Osman ve Ahmed b. Veli şehâdetleriyle mahzar-ı hasm-ı câhidde nâib ve sübût-ı vekâlete hükmolunan hâlâ zevci es-Seyyid Mehmed Çelebi b. Veli mahzarında üzerine da‘vâ ve takrîr-i kelâm edip zikr olunan Dâye Hatun mahallesinde vâki‘ bir tarafdan Süleyman Ağa menzili ve bir tarafdan merhûm Halil Paşa mülkü ve bir tarafdan Yağcı kızı Saime Hatun mülkü ve bir tarafdan tarîk-i âm ile mahdûd hâricen ve dâhilen büyût-ı adîdeyi müştemil mülk menzilimi bin doksan yedi senesinin yirmi altıncı günü zevcim müteveffâ-yı mezbûr el-Hâc Fazl[ullah] Ağa tarafından vekîli olan Abdurrahman Ağa b. Eyüb’e iki bin dokuz yüz guruşa bey‘ ve teslîm edip ol dahi müvekkili içün iştirâ edip semen-i mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl vekîl-i mezbûr cevâbında menzil-i mahdûdu, mezbûre Râbia Hatun târîh-i mezbûrda şer‘iyyâtçı olan Mehmed Emin Efendi huzûrunda vekîl-i mezbûr Abdurrahman Ağa’ya iki bin dokuz yüz guruşa bey‘ ol dahi müvekkili içün iştirâ edip semen olan meblağ-ı mezbûru vekîl-i mezbûrûndan tamâmen alıp kabz eyledim deyü ikrâr ve yedine işbu hüccet-i şer‘iyyeyi def‘ eyledi deyü mûmâ-ileyh Emin Mehmed Efendi’nin imzâsıyla mümzât ve mazmûnu min-külli’l-vücûh takrîr-i meşrûhuna mutâbıka hüccet-i şer‘iyye ibrâz edip mezbûre Râbia Hatun huzûrunda feth ü kırâet ve istintâk olundukda fi’l-hakīka menzil-i mezbûru ba‘de’l-bey‘ semen-i merkūmu vekîl-i mezbûrûndan tamâmen ahz eyledim deyü mûmâ-ileyh Mehmed Emin Efendi huzûrunda ikrâr ve hüccet-i merkūmeyi yedine def‘ eyledim lâkin ikrârımda kâzibe idim demekle mezbûre ikrâr-ı meşrûhunda kâzibe olmadığına merkūme Fâtıma Hatun’a yemîn teveccüh etmekle mezbûre Fâtıma Hatun’u tahlîf içün kıbel-i şer‘den Ahmed Efendi b. Mehmed Efendi irsâl olunup ol dahi müvekkile-i mezbûre Fâtıma’nın zâtı ma‘rifet-i şer‘iyye ile ârifân Mehmed Ağa b. İbrahim ve Salih Çelebi b. Ahmed müdde‘iye-i mezbûre Râbia huzûrunda mezbûre Râbia ikrâr-ı meşrûhuna ve kâzibe olmadığına mezbûre Fâtıma’ya yemîn teklîf eyledikde ol dahi ber-vefki’l-mesûl yemîn billâhi’l-aliyyi’l-a‘lâ etmeğin vâki‘ hâli mevlânâ-yı mezbûr mahallinde tahrîr ve ba‘dehû meb‘ûs olunan İbrahim Halil b. Mehmed ve Ahmed b. Ali ile meclis-i şer‘a gelip vukū‘u üzere inhâ ve takrîr etmeğin mezbûre Râbia Hatun mûcebiyle bî-vech mu‘ârazadan men‘ birle mâ-vaka‘a bi’t-taleb kayd şüd. Fî gurreti Cumâdelâhire sene 1110. Şuhûdü’l-hâl: Ahmed b. Abdullah, Süleyman b. Abdullah, Ahmed Bey [b.] Mirza, el-Hâc Yusuf b. Abdullah, Mehmed b. Hüseyin, Yusuf Ağa b. Abdullah