Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 753 Hüküm no: 604 Orijinal metin no: [140a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş’un vefatıyla terekedeki hakkını alması için varislerden Himmet’e, Halil Çelebi’nin vasi tayin edildiği Mahmiye-i İstanbul’da Ali Paşa-i atîk mahallesi sükkânından olup işbu sene-i mübârekede hacc-ı şerîfden gelirken esnâ-i tarîkde Tabut Kurusu nâm merhalede vefât eden sâdât-ı kirâm çavuşlarından es-Seyyid İbrahim Çavuş b. es-Seyyid Mehmed’in verâseti zevce-i metrûkesi Mihrican Hatun bt. Abdullah ile li-ebeveyn kız karındaşı Şerife Ferman Hatun’a ve li-eb karındaşı olup vilâyet-i Rumeli’de Osman Pazarı kazâsına tâbi‘ Turnacılar nâm karyede sâkin es-Seyyid Himmet nâm kimesneye münhasıra olduğu şer‘an mütehakkık oldukdan sonra müteveffâ-yı mezbûrun terekesinden karındaşı gāib-i mezbûr es-Seyyid Himmet’in hisse-i müntakilesini zabt ve hıfza taraf-ı şer‘den bir vasî nasb olunmak lâzım olmağın diyânetle ma‘rûf her vechile vesâyet uhdesinden gelmeye kādir olduğu zeyl-i kitâbda muharrerü’l-esâmî Müslimîn ihbârları ile ta‘yîn olunan gāib-i mezbûrun hemşîresi oğlu es-Seyyid Halil Çelebi b. es-Seyyid Burhan’ı hâkim-i muvakkı‘-ı sadr-ı kitâb vasî nasb ü ta‘yîn şüd. Fî 9 min-Cumâdelûlâ sene 1110. Şuhûdü’l-hâl: Fahrü’l-eşbâh Mehmed Seydi Efendi, Hüseyin Efendi el-imâm, es-Seyyid Ali Çavuş Ağa-i Ser-çavuşân, es-Seyyid Mehmed Çavuş b. es-Seyyid Abdülkerim