Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 754 Hüküm no: 605 Orijinal metin no: [140a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin Ağa’nın kölesi İvaz’ın hür olduğuna Hüseyin Ağa’nın eşi Ayşe’den başka şahit olmadığından İvaz’ın satışından sadece Ayşe’nin hakkının sakıt olacağı Mahmiye-i İstanbul’da Şeyh Ebulvefâ mahallesi ahâlîsinden olup işbu sene-i mübârekede medîne-i Belgrad’da vefât eden Hüseyin Ağa b. İbrahim’in verâseti zevce-i menkûha-i metrûkesi Âişe Hatun bt. Abdullah ile sulbiye sagīre kızı Hadîce’ye münhasıra ve tashîh-i meselesi sekiz sehmden olup sihâm-ı mezbûrenin bir sehmi zevcesi mezbûreye ve yedi sehmi farzen ve redden sagīre-i mezbûre Hadîce’ye isâbet ettikden sonra zâtı mahalle-i mezbûre sükkânından Mehmed Çelebi b. Vahid ve İbrahim Çelebi b. Ahmed ta‘rîfleriyle mu‘arrefe olan zevcesi mezbûre Âişe mahfil-i kazâda müteveffâ-yı mezbûr Hasan Ağa’nın rıkk-ı sâbıkını mu‘terif olan işbu uzun boylu, elâ gözlü, açık kaşlı, Rusiyyü’l-asl, Müslimü’l-millet İvaz b. Abdullah mahzarında ikrâr ve takrîr-i kelâm edip zevcim müteveffâ-yı mezbûr Hasan Ağa b. İbrahim’in işbu mevsûf-ı mezbûr İvaz abd-ı memlûkü olup mülkünde olduğu halde taltîf ve tatyîb murâd etmeyip hayr olmak üzere oğlumdur dedi ve mevsûf-ı mezbûr İvaz’ın sinninin dahi tahammülü olmağın hür olmuşdur dedikde gayrı şâhidi dahi olmayıp mezbûrenin ikrâr ve i‘tirâfı ancak hissesine geçip gayre tecâvüz ve sirâyet etmediğinden mâ‘adâ mezbûre müfside? olup İmâmeyn-i hümâmeyn hazretleri katında i‘tâk ve tahrîri kabûl etmemekle mevsûf-ı mezbûr mu‘tak oldukdan sonra fetâ olduğu halde kıymeti on sekiz bin akçe olduğu zeyl-i kitâbda muharrerü’l-esâmî Müslimîn ihbârlarıyla müte‘ayyen olup ba‘dehû mezbûre Âişe’nin meblağ-ı mezbûrdan sümün hissesine isâbet eden iki bin iki yüz elli akçesi sâkıt olup mâ‘adâ mebî‘a esmânı olan on beş bin yedi yüz on akçesi mezbûr İvaz’a lâzım gelmeğin sagīre-i mezbûrenin vasiyy-i muhtârı işbu hâzır bi’l-meclis Ali Bey b. Mehmed’e meblağ-ı mezbûru si‘âyet etmek üzere mezbûr İvaz’a ba‘de’t-tenbîh mezbûr Ali Bey dahi meclis-i mezbûrda bi-tav‘ihî ikrâr ve i‘tirâf edip merkūm İvaz meblağ-ı mezbûru sagīre-i mezbûrenin vasiyy-i muhtârı olduğum hasebiyle bana si‘âyet ve zâmin olmayıp gayb ederse merkūm İvaz’ın emri ile meblağ-ı mârrü’z-zikr on beş bin yedi yüz elli akçeye dahi kefîl ve zâmin oldum dedikde mâ-vaka‘a kayd şüd. Fî 8 min-Cumâdelâhire li-sene aşer ve mi’e ve elf. Şuhûdü’l-hâl: Mustafa Efendi b. Mehmed, Mehmed Efendi b. Mahmud, Abdullah Çelebi b. Mehmed, Süleyman Çelebi b. Mehmed, Ahmed Çelebi b. Osman