Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 757 Hüküm no: 609 Orijinal metin no: [140b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın oğlu Ahmed’e annesi Hatice’nin vasi tayin edildiği ve çocuk için bir cariye alınarak nafaka bağlandığı Mahmiye-i İstanbul’da Nişancı Paşa mahallesi ahâlîsinden olup bundan [akdem] vefât eden Mehmed Ağa b. Mustafa b. Abdullah’ın sagīr oğlu Ahmed’in tesviye-i umûruna kıbel-i şer‘den bir vasî nasb ü ta‘yîn olunmak lâzım ve mühim olmağın emânet ve diyânet ile ma‘rûf ve vesâyet uhdesinden gelmeye kādir idiği zeyl-i vesîkada muharrerü’l-esâmî Müslimîn ihbârları ile lede’ş-şer‘i’l-enver zâhir ve mukarrer olan sagīr-i mezbûrun vâlidesi bâ‘isetü’l-kitâb Hadîce Hatun bt. Mustafa Efendi’yi hâkim-i muvakkı‘-ı sadr-ı kitâb efendi hazretleri sagīr-i mezbûrun tesviye-i umûruna vasî nasb ü ta‘yîn <> buyurduklarında ol dahi vesâyet-i mezbûreyi ba‘de’l-kabûl merâsimini edâya müte‘ahhid oldukdan sonra vasiye-i mezbûre meclis-i şer‘de takrîr-i kelâm ve ta‘bîr ani’l-merâm edip vasiyesi olduğum [141a] sagīr-i mezbûr bir câriyeye eşedd-i ihtiyâc ile muhtâc olmağın istihdâmı için mal-ı mevrûsundan kadr-ı kifâye nafaka ve kisve-bahâ farz ve takdîr olunmak matlûbumdur dedikde vasiye-i mezbûrenin kelimât-ı meşrûhası vâkı‘a mutâbıka idiği zeyl-i vesîkada muharrerü’l-esâmî Müslimîn haberleri ile lede’ş-şer‘i’l-kavîm zâhir ve mukarrer olmağın hâkim-i mûmâ-ileyh hazretleri sagīr-i mezbûrun istihdâmı için mal-ı mevrûsundan semen-i misliyle bir câriye iştirâ ve sagīr-i mezbûr için mal-ı mevrûsundan hâdimesiyle yevmî kırkar akçe nafaka ve kisve-bahâ farz ve takdîr buyurup meblağ-ı mefrûz-ı mezbûru levâzım-ı sagīr-i mezbûra harc ü sarfa ve vakt-i hâcetde istidâne ve lede’z-zafer malına rücû‘a vasiye-i mezbûreye izin verilip mâ-vaka‘a bi’t-taleb ketb olundu. Fî gurre-i Rebî‘i’l-âhir li-sene aşer ve mi’e ve elf. Şuhûdü’l-hâl: Ahmed b. Süleyman, İbrahim Çelebi b. Mehmed, İbrahim Beşe b. Hüseyin, İbrahim Çelebi b. Ömer, Mustafa Beşe b. Mehmed