Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 756 Hüküm no: 608 Orijinal metin no: [140b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Hüseyin’in Hasan b. Abdullah’ı hayatta iken azat ettiği Kezâlik akd-i meclis-i şer‘-i şerîf eyledikde müteveffâ-yı mezbûra rıkk-ı sâbıkını mu‘terif işbu uzun boylu, açık kaşlı, sarı elâ gözlü, Nemçeviyyü’l-asl, Müslimü’l-millet bâ‘isü’l-vesîka Hasan b. Abdullah meclis-i ma‘kūd-ı mezbûrda müteveffâ-yı mezbûrun zevce-i menkûhası olmağla kendüye rık olup terekeden olmak üzere vaz‘-ı yed edip zâtı ba‘de’t-ta‘rîfi’ş-şer‘î mu‘arrefe olan İsmihan bt. Mehmed nâm hatun mahzarında üzerine da‘vâ edip seyyidim müteveffâ-yı mezbûr Hüseyin Çelebi b. Hasan b. Mustafa hasta ve alîl oldukda bi-emrillâhi te‘âlâ fevtimden sonra, benim için, malımdan âzâd olsun deyü huzûr-ı Müslimînde vasiyet edip musırran-aleyhâ vefât eyleyip ve müteveffâ-yı mezbûrun cemî‘ malının sülüsü benim fetâ kıymetimin nısfı olan altmış guruşa vâfî ve kâfî olmağla ben sâir ahrâr-ı asliyyîn gibi hür olmuşken mezbûre İsmihan bana rık olmak üzere vaz‘-ı yed eder suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda mahalle-i mezbûrede Sinan Efendi b. Ali ve Selim Ağa b. Fazlı li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Bakkāl Hüseyin b. Hasan b. Mustafa hasta ve alîl iken bi-emrillâhi te‘âlâ fevtimden sonra malımdan âzâd olsun deyü işbu mevsûf-ı mezbûr içün huzûrumuzda vasiyet edip musırran-aleyhâ vefât eyledi ve müteveffâ-yı mezbûrun cemî‘ malının sülüsü mevsûf-ı mezbûrun kıymetinin nısfı olan altmış guruşa vâfî ve kâfîdir, biz bu husûsa ilâ-âhirihî. Hurrire fi’t-târîhi’l-mezbûr li-seneti’l-merkūme. Şâhidûnü’s-sâbikūn