Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 760 Hüküm no: 611 Orijinal metin no: [141a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Süleyman’ın Abdullah b. Abdullah’ı hayatta iken azat ettiği Husûs-ı âti’z-zikrin mahallinde istimâ‘ ve tahrîri iltimâs olunmağın savb-ı şer‘den me’zûnen Mevlânâ Şerif Mehmed Efendi irsâl olunup ol dahi mahmiye-i İstanbul’da Kaliçeci Hasan mahallesinde sâkin iken bundan akdem vefât eden Boyacı el-Hâc Süleyman b. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun verâseti zevceteyn-i metrûketeyni Râbia bt. Abdullah ile Şehnaz bt. Abdullah nâm hatunlara ve kebîre kızları Emetullah ve Âişe’ye ve sagīr oğulları Salih ve Mustafa’ya münhasıra olduğu şer‘an zâhir ve mukarrer oldukdan sonra müteveffâ-yı mezbûra rıkk-ı sâbıkını mu‘terif işbu uzun boylu, al kumral sakallı [141b] Müslimü’l-millet râfi‘ü’l-kitâb Abdullah b. Abdullah meclis-i ma‘kūd-ı mezbûrda zikr olunan sagīrlerin vâlideleri ve kıbel-i şer‘den mansûbe vasîleri olan mezbûre Râbia ve mezbûretân Emetullah ve Âişe mahzarlarında üzerlerine da‘vâ ve takrîr-i kelâm edip seyyidim müteveffâ-yı mezbûr Boyacı el-Hâc Süleyman b. Abdullah hâl-i kemâl-i sıhhatinde fevtinden iki sene mukaddem huzûr-ı Müslimînde beni malından tahrîr ve i‘tâk edip ben sâir ahrâr-ı asliyyîn gibi hür olmuşken mezbûrûn bana rık olmak üzere vaz‘-ı yed eder suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahmiye-i mezbûrede Ali Paşa-i atîk mahallesinden el-Hâc Hüseyin b. Ali ve Cezerî Kasım Paşa mahallesinden Abdi Beşe b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Boyacı el-Hâc Süleyman b. Mehmed b. Abdullah hâl-i sıhhatinde fevtinden iki sene mukaddem mevsûf-ı mezbûr Abdullah’ı huzûrumuzda tahrîr ve i‘tâk ve zümre-i ahrâr-ı asliyyîne idrâc ve ilhâk etmekle mezbûr Abdullah sâir ahrâr-ı asliyyîn gibi hür olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim b. Mehmed ve Mehmed b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 24 min-Rebî‘ülâhir sene 1110. Şuhûdü’l-hâl: Ahmed b. el-Hâc Şa‘bân, Mustafa b. Ali, Ahmed Çelebi b. Abdullah, el-Hâc Hüseyin b. Ali