Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 761 Hüküm no: 612 Orijinal metin no: [141b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Paşa’nın hayatta iken İskenderiye sancağını iltizama verdiği İbrahim Ağa’nın zimmetini varislerin ibra ettiği Husûs-ı âti’l-beyânın mahallinde tahrîri içün savb-ı şer‘den bi’t-taleb irsâl olunan Mevlânâ Yahya Efendi b. el-merhûm Mustafa Efendi mahmiye-i İstanbul’da Kasab Timurhan mahallesi ahâlîsinden olup bundan akdem Doğan Kalası muhârebesinde şehîden vefât eden merhûm el-Hâc Ahmed Paşa b. Ali’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde merhûm-ı mezbûrun zevce-i menkûhası ve evlâd-ı sıgārının vasiye-i mansûbesi umdetü’l-muhadderât Âişe Hanım bt. el-merhûm Ahmed Paşa tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân el-Hâc Ali b. Mustafa ve Hazînedâr Ahmed Çelebi b. Mehmed şehâdetleriyle mahzar-ı hasm-ı câhidde vekâletine hükmolunan emîrü’l-ümerâi’l-kirâm Hasan Paşa b. el-merhûm Mustafa Ağa vekâleten ve merhûm mezbûr el-Hâc Ahmed Paşa’nın sulbî kebîr oğlu fahrü’l-akrân Ali Bey asâleten meclis-i ma‘kūd-ı mezbûrda hâfızü’l-kitâb umdetü’l-a‘yân el-Hâc İbrahim Ağa b. İsmail mahzarında ikrâr ve takrîr-i kelâm edip merhûm mezbûr el-Hâc Ahmed Paşa’nın hayâtında mutasarrıf olduğu İskenderiye sancağının yüz altı ve yedi senesine mezbûr İbrahim Ağa on yedi bin beş yüz guruşa iltizâm ile alıp meblağ-ı mezbûrun on yedi bin yüz on sekiz buçuk guruşu bi’d-defa‘ât temessükleri mûcebince merhûm mezbûr kabz edip bâkī üç yüz seksen bir buçuk guruş mezbûr İbrahim Ağa yedinde kalıp ve yüz sekiz senesinde zikr olunan sancağı yine mezbûr İbrahim Ağa merhûm mezbûr kabz edip mezbûr İbrahim Ağa zimmetinde iki bin altı yüz kırk guruş bâkī kalıp ve mukaddemâ İskenderiye sancağı mütesellimi Rif‘atî Ali Ağa’nın yüz ay hesâbından mezbûr el-Hâc İbrahim Ağa yüz dokuz guruş kabz etmekle min-haysü’l-mecmû‘ mezbûr İbrahim Ağa zimmetinde olan iki bin dokuz yüz elli buçuk guruşu mezbûr İbrahim Ağa yedinden tamâmen alıp ahz u kabz eyledik min-ba‘d zikr olunan sancak malına ve bi’l-cümle beynimizde cârî ahz u i‘tâ ve mu‘âmelât-ı şettâya müte‘allıka âmme-i da‘vâdan asâletimiz hasebiyle mezbûr İbrahim Ağa’nın zimmetini ve etbâ‘ından işbu Hasan Çelebi b. Abdullah’ın zimmetlerini ibrâ ve ıskāt eyledik min-ba‘d zikr olunan sancağa müte‘allıka da‘vâmız olmayıp husûs-ı mezbûra müte‘allık temessük dahi zuhûr ederse amel olunmaya dedikde gıbbe’t-tasdîkı’ş-şer‘î mezbûr İbrahim Ağa dahi mezbûrân mahzarlarında ikrâr edip medfû‘um olan meblağ-ı mezbûra müte‘allıka âmme-i da‘vâdan merhûm mezbûr el-Hâc Ahmed Paşa’nın veresesi zimmetlerini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî 8 min-Cumâdelâhire sene 1110. Şuhûdü’l-hâl: Şeyh Osman Efendi b. Ahmed, el-Hâc Yusuf b. Said, Cafer Ağa b. Mehmed, Ahmed Çelebi yazıcı, Kettânî Ahmed Çelebi