Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 762 Hüküm no: 614 Orijinal metin no: [142a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un vasiyetini yerine getirmek üzere Osman Efendi’yi vasi tayin edip mehrinin bir kısmını da eşine hibe ettiği Kezâlik meclis-i ma‘kūd-ı mezbûrda oğlu mezbûr Osman Efendi mahzarında ikrâr ve takrîr-i kelâm edip bi-emrillâhi te‘âlâ vefât eylediğimde cemî‘ terekemi ahz u kabz ve işbu bir çift zümrüd küpe ma‘a inci askı ve bir bütün inci kuşak bir çift yirmi dört miskāl altın bilezik sülüsümden olmak üzere ba‘de’l-kabz semen-i misilleriyle bey‘ ve kabz-ı semen ve esmânından iki yüz guruş ifrâz olunup meblağ-ı mezbûr ile menâsik-i hacc-ı şerîfe âlim ve fâzıl ve mütedeyyin bir kimesne yediyle benim içün hacc-ı şerîf ettirile ve bâkī terekenin sülüsü dahi ifrâz olunup sülüs-i mezbûrdan dört bin akçe ıskāt-ı salâtım görüle ve altı yüz akçesi Fâtıma bt. Mehmed’e ve dört yüz sekiz akçesi Saliha bt. Abdullah’a verile ve eyyâm-ı mübârekede tabh-ı ta‘âm ve it‘âm-ı fukarâ oluna ve fazla kalırsa senin re’y ve ma‘rifetin [ile] vücûh-ı birre harc ve sarf oluna deyü vasiyet ve ikrâr ve tenfîzine oğlum mezbûr Osman Efendi’yi vasiyy-i muhtâr nasb ve ihtiyâr ettim dedikde ol dahi muvâcehesinde vasiyet-i mezbûreyi kabûl ve hizmet-i lâzımesini edâya ta‘ahhüd ve iltizâm ettikden sonra mezbûre Hanife Hatun meclis-i ma‘kūd-ı mezbûrda zevci mezbûr Mehmed Efendi mahzarında hâl-i kemâl-i sıhhatinde tasarrufâtını nâfize olduğu halde bi-tav‘ihâ ikrâr ve takrîr-i kelâm edip zevcim mezbûr Mehmed Efendi zimmetinde mütekarrer ve ma‘kūdun-aleyh altı bin sağ akçe mehr-i müeccel hakkımın üç bin akçesini mezbûr Mehmed Efendi’ye hîbe ve temlîk ol dahi ittihâb ve temellük ve kabûl etmeğin zimmetinde ancak üç bin akçe mehrim bâkī kalmışdır dedikde gıbbe’t-tasdîk ilâ-âhirihî. Hurrire fi’t-târîhi’l-mezbûr li-seneti’l-mezbûre. Şuhûdü’s-sâbikūn