Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 762 Hüküm no: 613 Orijinal metin no: [141b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un evini oğlu Osman Efendi’ye sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ Ali Efendi b. Abdüllatif mahmiye-i İstanbul’da Eyne Bey mahallesinde sâkin Osman Efendi b. el-Hâc Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Abdullah Ağa mahallesinde sâkine olup zâtı zevci Mehmed Efendi b. Abdülhak ve İmâm Mustafa Efendi b. Ahmed ta‘rîfleriyle mu‘arrefe olan Hanife Hatun bt. el-Hâc Osman meclis-i ma‘kūd-ı mezbûrda kebîr oğlu işbu râfi‘ü’l-kitâb mezbûr Osman Efendi mahzarında bi-tav‘ihâ ikrâr edip babam merhûm mezbûr el-Hâc Osman b. Sefer’den bi’l-ırsi’ş-şer‘î bana isâbet ve intikāl eden mezbûr Abdullah Ağa mahallesinde vâki‘ bir tarafdan İbrahim Çelebi Vakfı’na ve iki tarafdan mezbûr Abdullah Ağa Vakfı’na ve bir tarafdan tarîk-i hâssa müntehî fevkānî iki bâb oda ve bir sofa ve dehliz ve bir kilâr ve bir kenîf ve tahtânî bir matbah ve bir su kuyusu ve bir kuyu mahzen ve bir kenîf ve havluyu müştemil menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile beş yüz guruşa oğlum mezbûr Osman Efendi’ye bey‘ ve temlîk ve teslîm ol dahi ber-vech-i muharrer temellük ve iştirâ ve tesellüm ve kabz ve kabûl edip semeni olan meblağ-ı mezbûr beş yüz guruşu benim mezbûr Osman Efendi’ye cihet-i karzdan zimmetimde deynim olan beş yüz guruşa takas ol dahi mukāssa ve kabûl edip ba‘de’l-yevm menzil-i mahdûd-ı mezbûr, mezbûr Osman Efendi’nin [142a] mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan b. Abdullah ve diğer Hasan b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fî 3 min-Cumâdelâhire sene 1110. Şuhûdü’l-hâl: Şeyh Ebubekir Efendi b. Ali Efendi, Ali Efendi b. İbrahim el-imâm, Musa Efendi b. Hasan, es-Seyyid Osman Çelebi b. es-Seyyid Mahmud, el-Hâc Ahmed b. Mehmed, Yusuf Çelebi b. Abdullah