Bab Mahkemesi 54 Numaralı Sicil (H. 1102 / M. 1691) cilt: 20, sayfa: 61 Hüküm no: 15 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Mehmed’in Ahmed Çelebi b. Durak’dan muhâlaa yoluyla boşanması Dârü’l-hilâfeti’l-aliyyeti’l-Osmâniyyeti’l-mahmiye mahallâtından Akşemseddin mahallesi sâkinlerinden olup, zâtını ma‘rifet-i şer‘iyye ile ârifân Yusuf Çelebi b. Abdurrahman ve Mustafa Çelebi b. Mehmed nâm kimesneler ta‘rîfleriyle mu‘arrefe olan Rahime bt. Mehmed nâm hâtun meclis-i şer‘-i şerîf-i enverde, zevc-i muhâlı‘ı işbu sâhibü’l-kitâb Ahmed Çelebi b. Durak nâm kimesne mahzarında ikrâr ve takrîr-i kelâm edip, zevcim mezbûr Ahmed Çelebi zimmetinde mütekarrir ve ma‘kūdun aleyh olan yirmi beş guruş mehr-i müeccelim ve nafaka-i iddet-i mu‘ayyenemden fâriğa olup ve me’ûnet-i süknâm dahi kendi üzerime olmak üzre zevcim mezbûr Ahmed Çelebi ile muhâla‘a-i sahîha-i şer‘iyye ile muhâla‘a olunup, ol dahi ber vech-i muharrer hul‘-ı mezbûru kabûl eylediğinden sonra hukūk-ı zevciyyete müte‘allika âmme-i da‘vâdan zevcim mezkûr Ahmed Çelebi’nin zimmetini ibrâ-i âmm-ı râfi‘ü’l-hisâm ile ibrâ ve iskāt eyledim. Ba‘de’l-yevm zevcim mezbûr ile husûs-ı mezbûra müte‘allika aslâ ve kat‘â da‘vâ ve nizâ‘ım yokdur dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mustafa Çelebi b. Ahmed, Mustafa Çelebi b. Ömer, Mustafa Çelebi b. Mehmed, Yusuf Efendi b. Abdurrahman, İbrahim Çelebi b. Ahmed, Çavuşzâde Mehmed Çelebi b. İdris, Ahmed Çelebi b. Ahmed ve gayruhüm.