Bab Mahkemesi 54 Numaralı Sicil (H. 1102 / M. 1691) cilt: 20, sayfa: 60 Hüküm no: 14 Orijinal metin no: [2b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Cafer’in Hacı Mustafa Ağa b. Hüseyin’e 8500 guruş borcu olduğu Fi’l-asl medîne-i Ayntâb’da Eyyûb oğlu mahallesi ahâlîsinden olup, hâlâ Denizli hâssı voyvodası olan Hasan Ağa b. Cafer b. Mehmed nâm kimesne meclis-i şer‘-i şerîf-i enverde, mahmiye-i İstanbul’da Sultan Selim Hân Câmi‘-i şerîfi kurbunda sâkin işbu râfi‘ü’l-kitâb el-Hâc Mustafa Ağa b. Hüseyin mahzarında ikrâr-ı tâm ve takrîr-i kelâm edip, ben hâss-ı mezbûrun peşini ve sâir harcına teslîm etmek için mezbûr el-Hâc Mustafa Ağa’dan istidâne ve kabz ve tesellüm eylediğim nakid altı bin esedî guruş ve yedinden iştirâ ve kabz edip, semenleri târih-i kitâbdan yetmiş bir gün tamâmına değin müeccel ve mev‘ûd her biri beynimizde ma‘lûm at ve katar ve samur kürk ve raht ve debbûs ve kılınç ve gaddâre bahâlarından dahi iki bin beş yüz esedî guruş ki, cem‘an yedine verdiğim deyn temessükü nâtık olduğu üzre mezbûr el-Hâc Mustafa Ağa’ya sekiz bin beş yüz esedî guruş [3a] zimmetimde lâzımü’l-edâ deynimdir dedikde, gıbbe’t-tasdîki’ş-şer‘î mahmiye-i mezkûrede Müfti Hamamı kurbunda sâkin Ahmed Ağa b. Mehmed meblağ-ı mezbûr sekiz bin beş yüz esedî guruşa emr ve kabûlü hâviye kefâlet-i sahîha-i şer‘iyye ile kefîl olmağın, mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Bayram Ağa b. ( ), Bosnevî Mehmed Ağa, Mehmed Bey b. Hasan, Uzun Mustafa Ağa, Halil Çelebi b. ( ), İbrahim [b.] Ahmed, İbrahim Çelebi b. Mehmed.