Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 773 Hüküm no: 624 Orijinal metin no: [144b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacca giderken vasiyet hazırlayan İbrahim Ağa’nın Hüseyin Çelebi’yi vasi, Abdürrahim’i de nazır tayin ettiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ Ahmed Efendi b. el-merhûm Mehmed Efendi irsâl olunup ol dahi mahmiye-i İstanbul’da Çelebioğlu mahallesinde fahrü’l-akrân İbrahim Ağa b. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i şer‘-i kavîm ettikde mezbûr İbrahim Ağa meclis-i ma‘kūd-ı mezkûrda hâfızü’l-kitâb Hüseyin Çelebi b. (°) mahzarında ikrâr ve takrîr-i kelâm edip işbu sene-i mübârekede ben azîmet-i tavâif-i Beytullâhi’l-harâm etmekle bi-emrillâhi te‘âlâ kazâ-i nahb edersem ümm-i veledlerim Fâtıma bt. Abdullah ve Sefire bt. Abdullah’dan her birine terekemin sülüsünden dörder minder ve altışar yasdık ve ikişer döşek ve altışar yorgan ve bir orta keçe ve üçer yan keçe ve dörder tencere ve sekizer sahan ve birer sini ve lâbis oldukları beşer kaftan ve beşer anteri ve birer mücevher kuşak ve birer sîm kuşak ve birer askılı zümrüd küpe ve birer altın bilezik ve ikişer yüz guruş verile ve Ali nâm abd-ı memlûküm bana istikāmet üzere hizmet ederse fevtimden sonra âzâd olup sülüs-i malımdan elli guruş verile ve yine terekemin sülüsünden iki yüz guruş ifrâz olunup mahalle-i mezbûrenin mukaddemâ imâmı olan Mustafa Efendi’ye meblağ-ı mezbûrdan yirmi guruş ve Mataracı Mahmud Bey’e yirmi guruş ve Ümmühani Hatun’a yirmi guruş ve Âişe Hatun’a yirmi guruş ve dadım Şahbaz’a yirmi guruş ve el-Hâc Abdülkerim zevcesi Saliha Hatun’a yirmi guruş ve baba zevcesine yirmi guruş ve tütüncü babaya yirmi guruş ve dükkândaş Mustafa Bey’e yirmi guruş ve Celeb Mustafa Bey’e yirmi guruş verile ve yine sülüs-i malımdan elli guruş ifrâz olunup meblağ-ı mezbûrun otuz guruşu ıskāt-ı salâtım içün devrolunup fukarâya tasadduk oluna ve ehl-i Kur’ân’dan on nefer adam birer hatm-i şerîf tilâvet edip sevâbını keremlerinden rûhuma ihdâ edeler mukābelesinde her birine ikişer guruş verile ve yine tere[ke]min sülüsünden iki yüz elli guruş ifrâz olunup meblağ-ı mezbûr ile bir mülk akār iştirâ ve vakf olunup hâsıl olan gallesi işbu hâzır bi’l-meclis eş-Şeyh İsmail Efendi b. Mehmed’e verilip mukābelesinde haftada iki gün Alacamescid’de talebe-i ulûm-ı nâfi‘a ta‘lîm-i ulûm eyleye ve mezbûr İsmail Efendi hayâtında oldukça cihet-i mezbûreye mutasarrıf olup fevtinden sonra ulemâdan birine tevcîh oluna deyü vasiyet ve tenfîzine mezbûr Hüseyin Çelebi’yi vasiyy-i muhtâr ve üzerine işbu hâzır bi’l-meclis el-Hâc Abdürrahim b. Kemâleddin’i hasbî nâzır nasb ü ta‘yîn eyledim dedikde onlardan her biri dahi vesâyet ve nezâreti kabûl ve merâsimini edâya müte‘ahhid olmağın vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan İbrahim Çelebi b. Mehmed ve Ahmed b. Hüseyin ile meclis-i şer‘de alâ-vukū‘ihi inhâ ve takrîr etmeğin mâ-vaka‘a kayd şüd. Fî gurre-i Cumâdelâhire li-sene aşer ve mi’e ve elf. Şuhûdü’l-hâl: Mehmed Ağa b. İsmail keresteci, Mehmed Ağa b. Abdullah, Ali Ağa b. Ahmed Kazgānîzâde