Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 772 Hüküm no: 623 Orijinal metin no: [144a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Nasrullah Efendi’nin vasiyetini yerine getirmek üzere kızı Halime Hatun’u vasi tayin ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Ali Efendi b. Abdüllatif mahmiye-i İstanbul’da Dîvâne Ali mahallesinde sâkin iken bundan akdem vefât eden Sahhâf eş-Şeyh Nasrullah Efendi b. Süleyman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun vech-i âtî üzere vesâyetini tenfîze vasiye-i muhtâresi olduğunu iddi‘â eden kebîre kızı olup zâtı Mahmiye-i mezbûrede Dizdâriye mahallesinde sâkin eş-Şeyh Receb b. Mehmed ve eş-Şeyh Mehmed b. Abdüllatif ta‘rîfleriyle mu‘arrefe olan hâfızü’l-kitâb Halime Hatun meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi ve terekesine bi’l-verâse vaz‘ı [yed] edip zâtı mu‘arrefân-ı mezbûrân ta‘rîfleriyle mu‘arrefe olan Muammer Hatun bt. Abdullah mahzarında üzerine da‘vâ ve takrîr-i kelâm edip babam müteveffâ-yı mezbûr Şeyh Nasrullah b. Süleyman b. Kemâleddin bundan iki ay mukaddem hâl-i sıhhatinde bi-emrillâhi te‘âlâ fevt olduğumda cemî‘ terekemden dört bin sekiz yüz sağ akçe ifrâz olunup meblağ-ı mezbûr ile vech-i mesnûn üzere levâzım-ı techîz ve tekfînim görüle ve eyyâm-ı mübârekede tabh-ı ta‘âm ve it‘âm-ı sulehâ ve fukarâ oluna ve sülüsünden altı yüz akçe dahi ifrâz olunup karındaşım kızı olup vârisim olmayan işbu Saliha Hatun bt. Mehmed’e verile ve üç yüz altmış akçe dahi ifrâz olunup oğlum merhûm Süleyman’ın kebîre kızı Âişe’ye verile ve üç yüz yetmiş akçe dahi ifrâz olunup merhûm mezbûr Süleyman’ın zevcesi Safiye bt. Abdullah’a verile ve üç yüz altmış akçe dahi ifrâz olunup kız karındaşım kızı Meryem Hatun bt. Mustafa’ya verile ve üçer yüz akçe dahi ifrâz olunup kız karındaşım merhûme Saliha’nın kızları Fâtıma Hatun ve Hadîce Hatun’dan her birine verile ve bin sekiz yüz akçe dahi ifrâz olunup ümmü’l-veledim Gülbahar Hatun bt. Abdullah’a verile deyü vasiyet edip tenfîzine ve sagīre kızları Hadîce ve Zeyneb’in mal-ı müntakillerini zabt u hıfza ve vakt-i rüşd-i sedâdlarına varınca tesviye-i emrlerine ve sulbî kebîr oğlu olup hâlâ diyâr-ı âharda olan Abdurrahman nâm gāibin hisse-i irsiyesini zabt ve hıfza beni huzûr-ı Müslimînde vasiye-i muhtâre nasb ü ta‘yîn ben dahi muvâcehesinde ba‘de’l-kabûl musırran-aleyhâ fevt oldukda tenfîz-i vesâyâ murâd ettiğimde mezbûre Muammer Hatun tasarrufuma mâni‘a olur suâl olunsun dedikde gıbbe’s-suâl mezbûre Muammer Hatun cevâbında terekesine vech-i muharrer üzere vaz‘-ı yedini ikrâr ve müdde‘iye-i mezbûrenin vech-i meşrûh üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı Müslimînden mahmiye-i mezbûrede Esirci Kemâl mahallesinde sâkin es-Seyyid Mehmed Çelebi b. es-Seyyid Lutfullah ve eş-Şeyh Abdurrahim b. Mehmed meclis-i ma‘kūd-ı mezbûrda hâzırân olup isre’l-istişhâd fi’l-hakīka müteveffâ-yı mezbûr bâlâda tahrîr olunduğu vech üzere vesâyâ-yı mu‘ayyenesini tenfîze ve li-ebeveyn kızları Zeyneb ve Hadîce’nin tesviye-i umûrlarına müdde‘iye-i mezbûre Halime’yi vasiyy-i muhtâr nasb ü ta‘yîn ol dahi muvâcehesinde kabûl ve musırran-aleyhâ vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hüseyin b. Mehmed ve Hasan b. Abdullah ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd şüd. Fî gurre-i Rebî‘ülâhir sene 1110. Şuhûdü’l-hâl: Hüseyin Efendi b. İsmail, Abdülbaki Efendi b. Mehmed imâm, Mehmed Efendi b. Muharrem el-müezzin, es-Seyyid Ahmed Çelebi b. es-Seyyid Ahmed, Şeyh Salim b. Mehmed, Şeyh Receb b. Mehmed, Şeyh Ali b. Şa‘bân