Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 779 Hüküm no: 630 Orijinal metin no: [145a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un elinde olan ev ve eşyada vefat eden babası Yusuf’un alakası olmadığından varislerin hak talep edemeyeceği Mahmiye-i İstanbul’da el-Hâc Timur mahallesinde sâkin iken bundan akdem vefât eden el-Hâc Yusuf b. Abdullah’ın verâseti zevce-i menkûha-i metrûkesi Havva Hatun bt. Abdullah ile kebîre kızları Afife ve Asiye Hatun’a ve sagīr oğulları Abdullah ve Ali’ye münhasıra oldukdan sonra zâtı ta‘rîf-i şer‘î ile mu‘arrefe olan mezbûre Havva Hatun asâleten ve sagīr-i mezbûr Ali’nin vasiye-i mansûbesi olmağla vesâyeten mahfil-i kazâda zâtı ta‘rîf-i şer‘î ile mu‘arrefe olan hâfızü’l-kitâb mezbûre Afife Hatun mahzarında üzerine da‘vâ ve takrîr-i kelâm edip mezbûre Afife bin yüz dokuz senesi Zilka‘desi’nin on altıncı günü târîhiyle müverraha Davudpaşa mahkemesi nâibi Abdullah Efendi’nin imzâlı hücceti mûcebince mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzili içinde mevcûde [145b] eşyâsında ve menzilinde benim alâka ve medhalim yokdur, babam el-Hâc Yusuf’un mülk ve hakkıdır deyü mezbûre Afife yedinde olan mülk menzil ve menzil içinde olan eşyâyı mezbûre Afife dahi mülk etmekle menzili ve içinde olan eşyâyı müzâyede olmakdan imtinâ‘ eder suâl olunsun dedikde gıbbe’s-suâl mezbûre Afife cevâbında işbu hüccet-i mezbûre târîhinden beş gün sonra babam mezbûr el-Hâc Yusuf b. Abdullah hâl-i kemâl-i sıhhatinde kızım mezbûre Afife’nin yedinde olan menzilinde ve içinde olan eşyâda aslâ benim alâka ve medhalim yokdur kâffesi mezbûre Afife’nin mülk ve hakkıdır deyü huzûr-ı Müslimînde ikrâr ve işhâd etmişdir deyü def‘le mukābele ve istintâk olunsun dedikde gıbbe’l-istintâk ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahmiye-i mezbûrede Kasab Timurhan mahallesinden Yahya Efendi b. Mustafa Efendi ve Mehmed Çelebi b. Ali ve Ahmed Çelebi b. Kenan li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffâ-yı mezbûr el-Hâc Yusuf b. Abdullah târîh-i hüccet-i mezbûreden beş gün sonra hâl-i kemâl-i sıhhatinde huzûrumuzda kızım mezbûre Afife’nin yedinde olan menzilde ve içinde olan eşyâda aslâ alâka ve medhalim yokdur, kızım mezbûre Afife’nin ke’l-evvel mülk ve hakkıdır deyü huzûrda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd şüd. Fî 14 min-Cumâdelâhire sene 1110. Şuhûdü’l-hâl: Mustafa Efendi b. Hüseyin, Ahmed Ağa b. Hüseyin, Süleyman Ağa b. Hasan, Mehmed Çelebi b. Abdullah, Mehmed Çelebi b. Ali