Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 780 Hüküm no: 631 Orijinal metin no: [145b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Havva Hatun’un kocası Bıçakçı Yusuf’un terekesinden mehir alacağı olduğu ve oğlu Ali’ye annesinin vasi tayin edildiği Mahmiye-i İstanbul’da Hacı Timur mahallesinde sâkin iken bundan akdem vefât eden Bıçakçı el-Hâc Yusuf b. Abdullah b. Abdullah’ın zevce-i menkûhası olup zâtı mahalle-i mezbûre sükkânından Süleyman Ağa b. Hasan ve Ahmed Ağa b. (°) ta‘rîfleriyle mu‘arrefe olan râfi‘atü’l-kitâb Saraylı [Havva] Hatun bt. Abdullah mahfil-i kazâda müteveffâ-yı mezbûrun sulbiye kebîre kızı olup zâtı mu‘arrifân-ı mezbûrân ta‘rîfleriyle mu‘arrefe olmağla terekesine bi’l-verâse vaz‘-ı yed eden Afife Hatun mahzarında üzerine da‘vâ ve takrîr-i kelâm edip zevcem müteveffâ-yı mezbûr el-Hâc Yusuf b. Abdullah b. Abdullah târîh-i rakamdan on bir sene mukaddem tezevvüc murâd eyledikde yüz guruş mehr-i müeccel tesmiyesiyle huzûr-ı Müslimînde beni tezevvüc murâd eyledikde kabûl edip akd-i nikâh beynimizde kāim iken kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı Müslimînden mu‘arrifân-ı mezbûrân Süleyman Ağa b. Hasan ve Ahmed Ağa b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Yusuf b. Abdullah b. Abdullah hâl-i kemâl-i sıhhatinde târîh-i mezbûrda tezevvüc murâd eylediğinde yüz guruş mehr-i müeccel tesmiyesiyle işbu müdde‘iye-i mezbûre Saraylı Havva Hatun bt. Abdullah’ı bizim huzûrumuzda tezevvüc ve kabûl edip akd-i nikâh beynlerinde kāim iken fevt oldu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb kayd şüd. Fi’t-târîhi’l-mezbûr li-seneti’l-mezbûre. Şuhûdü’l-hâl: Yahya Efendi b. Mustafa, Ahmed Ağa b. Abdullah, Süleyman Ağa b. Hasan, el-Hâc Mustafa b. el-Hâc Yusuf Sagīr-i mezbûr Ali’nin vakt-i rüşd-i sedâdına varınca vâlideleri mezbûre Havva Hatun vasî nasb olunduğu kayd şüd. Fi’t-târîhi’l-mezbûr li-seneti’l-mezbûre. Şâhidûnü’s-sâbikūn