Bab Mahkemesi 54 Numaralı Sicil (H. 1102 / M. 1691) cilt: 20, sayfa: 62 Hüküm no: 17 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Ramazan’ın İnce Kara Mehmed Çavuş Vakfı’na olan borcunu ödemesi Ashâb-ı hayrâtdan merhûm İnce Kara Mehmed Çavuş Vakfı’na hâlâ mütevellî olan işbu bâ‘isü’l-kitâb Mehmed Çelebi b. Mustafa meclis-i şer‘-i şerîf-i enverde Meryem bt. Ramazan nâm hâtun mahzarında üzerine da‘vâ ve takrîr-i kelâm edip, târih-i kitâbdan bir sene mukaddem mütevellîsi olduğum vakf-ı mezbûrun asl-ı mâlından mezbûre Meryem’e altmış dokuz esedî guruş bi’t-tevliye idâne ve teslîm ve sene-i kâmile tamâmına değin devr-i şer‘î ile ber vech-i şer‘î üzerine dokuz guruş murâbaha iltizâm, ol dahi istidâne ve iltizâm ve meblağ-ı mezbûr altmış dokuz guruşu yedimden ahz u kabz etmişdi. Müddet-i mezkûre münkaziye olmağın, hâlâ suâl olunup meblağ-ı mezbûr altmış dokuz guruş ile murâbaha-i şer‘iyyesi dokuz guruş ki, cem‘an yetmiş sekiz guruşu vakf için bana edâya tenbîh olunması matlûbumdur dedikde, gıbbe’s-suâl mezbûre Meryem ol mikdâr meblağı istidâne ve kabzını inkâr edicek, müdde‘î-i mezbûrdan müdde‘âsına beyyine taleb olundukda, zât-ı mezbûreyi ma‘rifet-i şer‘iyye ile ârifân olan udûl-i müslimînden es-Seyyid Mehmed Efendi b. İbrahim ve Abdülkādir Efendi b. Süleyman li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ işbu mütevellî mezbûr Mehmed Çelebi târih-i kitâbdan bir sene mukaddem mütevellîsi olduğu asl-ı mâl-ı vakf-ı mezbûru mezbûre Meryem Hâtun’a altmış dokuz esedî guruş idâne ve teslîm ve bir sene tamâmına değin devr-i şer‘î ile ber vech-i şer‘î üzerine dokuz guruş murâbaha-i şer‘iyye ile ilzâm, ol dahi istidâne ve kabz ve iltizâm etmişdi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle ba‘de’l-hükm ve’l-kazâ asl-ı mâl-ı mezbûr ile murâbaha-i şer‘î cem‘an yetmiş sekiz guruş vakf için mütevellî-i mezbûre edâ ve teslîme mezbûre Meryem’e tenbîh olunup, işbu vesîka bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, İbrahim Çelebi b. Ahmed, Mustafa b. Şaban, İbrahim Çelebi b. Mehmed ve gayruhüm.